256/2023-2024

Kolasib dated 28th April 2023: Vawiin khan DC Conference Hall, Kolasibah kum ina a vawi khatna atan District Sports Committee, Kolasib district chuan thutkhawmna an nei a. Deputy Commissioner Pu John LT Sanga, Chairman, District Sports Committee chuan hun kaihruaiin Pu Vanlalsawma, Sr. Vice Chairman leh District Youth & Sports Officer Pu C.Lalrinsanga, Secretary ni bawk chuan thu rel tur hrang hrang sawi zauna hun an hmang bawk a ni.

Pu John LT Sanga, Deputy Commissioner chuan District Sports Committee chu Kolasib thalaite infiamna leh hriselna kawng tha kawhhmuh tur a mawhphurna pawimawh tak chelhtu an nih thu sawiin ruihtheih thil lak a thalaite fihlim tur a kaihruaitu hmanraw pawimawh tak an nih thu a sawi a. Kolasib district chhung a Sports hmanga hmasawnna thlen tur a Sports Association hrang hrangte inkar ah thawhhona tha neih a tul thu a sawi bawk a ni.

Vawiin thutkhawmnaah hian Kolasib district chhung a Sports Association 26 awm zing a 19 chu District Sports Committee hnuai a inziaklut an nih thu tarlan niin inkaihhruaina awmsa angin heng Sports Association-te hi May, 2023 ral hma a inziakluhna hun hawn ni se tih a rel a ni. Kolasib Sports Stadium, Project venga District Sports Conference Hall leh a chhung a bungrua awm te chu uluk leh felfai zawk a enkawl a nih theih nan Chairman, District Sports Committee kut ah chahbi dah ni se tih rel niin member-ten May ni 1, 2023 chawhnu hian a hmun endik ni se tih rel a ni bawk. Sports hrang hrang tih hmasawn nana ‘Sports Promotion Fund’ lo kal dante thlirlet niin a hman chhuah dan duan lawkna siam a that tur thu sawi a ni bawk.