2100/2023-2024

Khawzawl, 2nd October 2023: Cheng nuai 170 senga sak Khawzawl District Urban Development Officer (DUDO) Office chu tukin khan Deputy Chief Minister, UD&PA changtu Pu Tawnluia chuan a hawng a. He hunah hian Mizoram State Rural Livelihood Mission (MzSRLM) Credit Camp neih nghal a ni bawk.

Khawzawl Zaingen Venga DUDO Office sak thar awmna hmun hi Deputy CM Pu Tawnluia te chhungkuain an pa Pu Hrangkhupa hriatreng nan an pek a ni a. SEDP 2019-20 leh 2022-23 atanga sakna sum hi hmuh niin, building sak zawh nan hian cheng nuai 380 ruahman a ni. Building hi Mizopa chhiara chhawng ngaa sang tur a ni a - Staff Quarters, DUDO Quarters, Office, Garage, Guest Room leh Conference Hall te a awm dawn a, tukin khan DUDO Office bik hi Deputy Chief Minister Pu Tawnluia chuan a hawng ta a ni.

Khuallian Pu Tawnluia chuan UD&PA chuan khawpui tihchangkan, tihhmasawn leh khawpui chhunga mirethei te khaichhuah chu a ngaipawimawh hle a ni, a ti a. Khawzawl khua leh District chhung atanga ram pum huap fai lawmman dawng an awm thin chu a lawmawm hle a ni, a ti bawk. District khawpui a nih hnuah Khawzawl chu UD&PA hnuaiah nasa taka chei that leh cheimawi a nih thu pawh sawiin, hnathawh zawh tawh leh kal lai hrang hrang te a tarlang a, khawlai chei nan ringawt pawh cheng nuai 300 hman a ni tawh tih a tarlang bawk.

Tuichang AC bialtu ni bawk Pu Tawnluia chuan UD&PA hnuaiah khawpui tana chhenfakawm hmunhma din zel a nih a beisei thu a sawi a.Vawiina a hawn tak DUDO office chu khawtlang tana chhenfakawm tak a nih theih nan duhsakna sang ber a hlan a ni.

Khawzawl Bawrhsap Pu K. Lalrohlua pawhin he hunah hian thu sawiin Commercial Area hmun tha taka building sakna hmunhma petu Pu Tawnluia te chhungkua chungah lawm thu a sawi a, DUDO Office chu Khawzawl District mipui ten tangkai taka an hman theih nan duhsakna a hlan nghal bawk.

MzSRLM hnuaia Credit Camp neihah hian Self Help Group 65 ten Bank Branch 5 atangin loan cheng nuai 2,32,40,000 an la a. Khawzawl RD Block hnuaiah hian khaw 26 awmin, SHG 400 an awm a, member 3448 an awm mek a ni.

Inkhawm hi UD&PA Joint Director (Plan) Pu Andrew Lalhruaia chuan a kaihruai a. Assistant Engineer Pu J. Laldingliana chuan technical report pein; Khawzawl District Urban Development Officer Pu Lalthakima Chhangte chuan lawmthu sawina hun a hman hnuah inkhawm hi tih tawp a ni.