2101/2023-2024

Dt. 29.9.2023(Friday) khan Pu R Lalremsanga MCS, Inspector General of Prisons chuan Mamit Jail a tlawh a, Jail tangten an harsatna leh mamawh an lo thlente  a sawipui a, harsatna dang an neih pawhin Jail thuneitute hnenah lo sawi zel a hmalakpui zel a tum thute a hrilh. Tin, jail staff te meeting neihpui nghalin Mamit Jail thawktute inenkawlna leh hmunhmate a felfai thute a sawi a, jail enkawlna hna hi hna hautak tak, mi vantlangin misuala an ngaih, vantlang himna kengtel a nih bawk avangin missionery rilru pua thawh a ngaih thu leh fuihna thu tha tak tak a sawi bawk. Tin, jail hi inhremna ngawr ngawr ni lovin insiamthatna(reformation) hawi zawnga kal a tul tawh thu a sawiin, Open Jail(Jail tangten an tan chhung tho a jail pawna hna hrang hrang thawk a Jail-a tlaia kir leh) anga kal ve te a tul thu a sawi bawk. Tin, female ward pakhat luah theihloha awm mek pawh luah theiha buatsaih a tum thute, staff indaihlohna pawh  a theih ang anga hmalakpui a tum thute a sawi bawk. Tin, Jail tangte pawh fuihin feltaka awm tur leh tlanchhuah lam reng reng ngaihtuahlo turin a fuih bawk. Jail staff te pawh jail security ngai pawimawh turte, thawhhona tha tak nei zel tur leh tang damlo damdawiina refer te pawh ngun taka veng thin turin a fuih bawk.