2102/2023-2024

Champhai the 2nd October, 2023 - Vawiin khan Champhai Zotlang Sports Stadium-ah Dinthar Veng Branch YMA buatsaihin thalaite tana intihhlimna leh sports discipline hrang hrang hnuaia intihsiakna 'Favang Olympics' neih a ni a. Transport, EF&CC etc changtu Minister leh bialtu MLA ni bawk Pu TJ Lalnuntluanga chuan khuallian niin a hawng a ni.

Hawnna inkhawm tawi neihah Pu TJ Lalnuntluanga chuan thu sawiin thalaite hmakhua ngaia an tana program hlu tak buatsaih saktu Dinthar Veng Branch YMA te chungah lawmthu a sawi a. Dinthar Veng ti hmasawn zel turin Sawrkarin hma a lak mek zel thu sawiin inkalpawhna kawng tha zawk siam te, hall chei that te, Dinthar Veng field siam te leh hmalakna dangte buaipui chhoh mek zel a ni, a ti a. Favang Olympics chuan thalaite rilru leh taksa hriselna kawngah te leh khawtlang mipuite inlungrualna kawngah te nghawng tha tak a neih ngei a beisei thu sawiin kalkhawmte chu hun hlimawm leh hlawkthlak tak hmang theuh turin duhsakna a hlan a ni.

Favang Olympics-ah hian Dinthar Veng Branch YMA hnuaia Section-ten sports discipline hrang hrang te bakah hnam lam leh hnam zai ah te an intihsiak a ni.