2099/2023-2024

Khawzawl, 2nd October 2023: Vawiin khan Deputy Chief Minister, Tuichang AC bialtu ni bawk Pu Tawnluia chuan Khawzawl Higher Secondary School Science & Commerce Building chu a hawng.

Khawzawl HSS Staff Common Room-a inkhawm tawi neihah thu sawiin khuallian Pu Tawnluia chuan Khawzawl HSS Science & Commerce Building hawn a ni ta chu hlawhtlinna ropui tak, hmasawnna rahbi pakhat a nih thu sawiin, Khawzawl HSS provincialised a ni ta chu zirlai leh zirtirtute a lawmpui thu a sawi bawk. Mizoram sawrkar chuan thalaite hmasawnna atan zirna mai bakah infiamna leh mahni kutkawiha eizawnna (entrepreneurship) tihhmasawn a ngaipawimawh hle, a ti a. Hripui lengin hmasawnna hna thawh tikhaihlak mah se, theihtawp sawrkarin a chhuah zel tur thu a sawi.

Deputy CM chuan Cabinet Meeting hnuhnung berah Mizoram chhunga sikul 311 zet te chu dinhmun tha zawkah sawrkarin a hlankai thu a sawi a. Khawzawl District chhungah ngei pawh sikul 15 zet chu dinhmun tha zawkah hlankai an ni, a ti. Sawrkarin lumpsum-a sikul a puihna pawh tihsan a nih thu sawiin - Category A in cheng nuai 6, Category B in cheng nuai 4, Category C in cheng nuai 2.5 an dawng tawh dawn tih a tarlang bawk a ni.

Deputy CM hian Khawzawl HSS Science & Commerce Block panna kawng siam nan hian MLA Fund atangin cheng nuai 5 a pe tih inkhawmah hian tarlan a ni bawk.

Khawzawl DC Pu K. Lalrohlua pawhin he hunah hian Khawzawl District chhungah zirna kawnga hmasawnna hrang hrang hmuh theiha a awm chu ropui a tih thu a sawi a. District chhunga school engemawzat dinhmun tha zawka hlankai an nih thu te, Khawzawl Model High School-ah HSLC exam center thar neih a nih thu te leh DoNER Ministry-in khum 50 awmna tur Khawzawl Hospital sakna a pawm fel tawh thu te a tarlang a. Zirna in a tum ber ‘kawng engkima hmasawn’ (all round development) neih tum theuh turin zirlai kalkhawmte chu a chah nghal bawk a ni.

Khawzawl HSS Science & Commerce Building hi cheng nuai 244.4 senga sak a ni a. Mizopa chhiara chhawng thuma sang a ni a, Ground floor-ah hian Science Laboratory a awm a, first floor-ah Teachers’ Common Room, Principal Room leh Art & Craft Room te a awm a, Second floor-ah hian classroom pali a awm a, floor tinah hian mipa leh hmeichhe inthiarna a awm bawk. Khawzawl HSS Science Stream hi kum 2016-a din a ni a, Commerce Stream hi 2019 ah din a ni thung. Tun dinhmunah zirlai 51 awmin, zirtirtu 11 in an enkawl mek a ni.

Inkhawm hi Khawzawl District Samagra Shiksha Deputy DPO, Pu K. Thantluanga chuan a kaihruai a. Pu JH Rodawla, Head Assistant chuan technical report pein,  SDEO Pu Francis Lalruattluanga chuan lawmthu sawiin inkhawm hi a khar a ni.