1901/2023-2024

Khawzawl, 15th September 2023: Vawiin khan Samagra Shiksha hnuaia ‘Netaji Subhash Chandra Bose Awasiya Vidhyalaya Girls Hostel’, Khawzawl chu Deputy Chief Minister Pu Tawnluia, Tuichang AC bialtu ni bawk chuan a hawng a. Khawzawl HSS-a Science & Commerce Building sak mek pawh a hmunah a enfiah nghal a ni.

Hostel hawnna inkhawm Khawzawl HSS-a neihah khuallian Pu Tawnluia chuan khawtlang hruaitu hmasate rualawhna chuan rah tha a chhuah zel thu a sawi a. Khawzawl khua chu District Headquarters a nih hnuah khawpui leh khaw lian a nih angin a mamawh te a pung zel a ni, a ti a. Khawzawlin District a hmuh theih nan leh District tih puitlinna kawngah mipuite duhsakna dawnga theihtawp chhuah thei dinhmuna a ding chu lawmawm a tih thu a sawi bawk a ni.

Deputy Chief Minister chuan District chuan fu ke leh ban tam tak a keng a ni tiin, chung zinga peng pawimawh tak pakhat zirna kawnga hmasawnna a awm theih nana hmalatu District Education Officer-in Khawzawl a thutchilh ta chu a vanneihthlak hle a ni, a ti a. India ram zalenna sualtu pawimawh tak Netaji Subhash Chandra Bose-a hming chawi ‘Girls Hostel’ hawn a ni ta chu lawmawm a tih thu pawh sawiin Mizo ram leh hnam humhalh tura zalenna sualtute pawh mitinin an hriat reng a tul a ni, a ti bawk. Mizoram sawrkar chuan thalaite hmasawnna a ngaipawimawh em em a ni Deputy CM chuan a ti a, zirlai kalkhawmte chu ram leh hnam tungdinga, tizahawma , tihmasawna, tithanglian turin mawhphurhna an nei tih hre turin a chah a. Khawvel changkanna thang chho zel karah pawh Mizo hnam thinlung leh rilru ( Mizo nationalism) pu tlat tura chahin, hma lam thui tak thlira rilru siam reng turin a fuih bawk a ni.

Deputy Chief Minister hian Hostel zirlai naupangte ‘Security Deposit’ a tum sak tur thu pawh sawiin, Hostel leh Khawzawl HSS Commerce & Science Building sak mek panna kawng pawh PCC Flooring-a thuam that a nih theih nan hmalak pui a tum thu a sawi a. Inkhawmah hian Khawzawl Primary leh Middle School naupangte awmna tur Hostel sak nan cheng nuai 118 pawm a nih tawh thu pawh tarlan a ni bawk.

He hunah hian Khawzawl HSS Principal Pu Joseph Zonunmawia chuan report pe-in vawiina hawn tak Hostel chu Mizoramin ‘Netaji Subhash Chandra Bose Awasiya Vidhyalaya’ hnuaia hostel 11 siamna tur a hmuh zinga pakhat a nih thu a tarlang a. Hostel-ah hian Seat 30 awmin High School atangin mi 10 leh Higher Secondary School atangin mi 20, an vaiin naupang 30 an awm dawn a. Hostel-a awm zirlaite mamawh hi sawrkarin a tum sak vek dawn a, an chak lohna subject-a pui turin ‘tuition fee’ pawh a tum sak dawn a ni. Hostel hi Warden - 1, Full time Accountant - 1, Head Cook - 1, Asst. Cook- 2, Peon - 1, Night Guard - 1 an vaiin mi pasarihin zirlaite hi an vil dawn a ni.

Girls Hostel hawnna inkhawm hi District Education Officer (DEO) Pu Lalsikula chuan a kaihruai a. Block Research Centre Coordinator Pu PC Rosiama chuan lawmthu sawiin inkhawm hi tih tawp a ni.