1902/2023-2024

Aizawl, the 15th September, 2023: Vawiin chawhnu dar 2 khan I&PR Minister Pu Lalruatkima chuan Zoram Medical College (ZMC) College Week kharna leh Cultural Day ‘ELIXIR 2023', Dawrpui Multipurpose Hall-a neih chu khuallian niin a hmanpui.

Khuallian Pu Lalruatkima chuan ZMC in hun pawimawh tak College Week kharna leh Cultural Day, Elixir 2023 hmang tura an sawm chu lawmawm tiin, zirna bakah taksa leh rilru hriselna lam hawi program pawimawh tak an buatsaih chu fakawm a tih thu a sawi a. Zoram Medical College puitlin a nih theih nan leh tun dinhmun thleng tura hmalakna hrang hrangte tarlangin, theihtawp chhuahtu leh sulsutute fakawm a tih thu a sawi a. Zirtirna leh tihdam rawngbawlna Lal Isua hnungzuia thawktu, mi bawrhsawm tena an pan thin Doctor-te rawngbawlna chu ropui a tih thu a sawi a. Hriselna chu ram changkang tehfung pawimawh tak a nih thu sawiin, Infant Mortality Rate bika India rama State titha ber dinhmun Mizoramin a hauh chu Health Department, Doctor rual, mithiam tak tak leh thawktu dangte thahnemngaihna vang a ni, a ti a. Damdawi chu damna mah ni se, hmansual chuan nunna hial chan theihna a nih avangin a hman danah kan fimkhur a tul hle a ni, a ti a. Damlote an kutah an innghah tlat thin thu leh an lo dawnsawn leh enkawl dante bakah zirtirnate'n ram mipui damna a thlen thu tarlang a. An lakah beiseina sang tak mipuiin an neih thu a sawi bawk.

I&PR Minister chuan sawi chhunzawmin, hnam ropui apiangin hnam ziarang leh nunphungte an zah thin thu leh an chhuan thu sawiin, ZMC zirlaite chu nakin zelah pawh hnam ziarang leh nunphungte zahpui lova chhawmnung zel turin a chah a. Nu leh pa, aia upa leh zirtirtute chawimawia zah fo turin a fuih bawk a. Thiamna tak tak nei tura theihtawp chhuaha lehkha zir tur te, degree neih maia lungawi lova, rawn tlak leh inghahna tlak nih tum turin a fuih a. Doctor mamawhna leh indaihlohna awmte phuhru thei tura ngaihtuahna seng turin a chah bawk a. Doctor zir mekte chu hmabak eng tak an neih thu hrilhin, ram leh hnam tana chhenfakawm leh chhawrnahawm tak nih tum tlat turin a chah nghal bawk.

Thusawitu dang ZMC Director Dr. John Zohmingthanga chuan ZMC thuamthat leh tihchangtlun kawnga Sawrkarin theihtawp a chhuah thin chu lawmawm a tih thu a sawi a. College Week 2023 felfai taka zawhfel a nih theih nana theihtawp chhuahtute chhuanawm a tih thu a sawi a. ZMC zirlaite, a bik takin State pawn atanga lokalte lawmna thu sawiin, theihtawp chhuaha lehkha zir zel turin a fuih nghal bawk.

Vawiin hun hmanah hian Lalrinawma, ZMC Evangelical Union President chuan hunserh hmangin K.Lalruatfela, ZMC Students' Union President-in kalkhawmte lawmna thu a sawi a. Dr. Jane R. Ralte, Registrar, ZMC hnen atangin thusawi ngaihthlak a ni bawk.

He hunah hian ZMC College Week, Elixir 2023, September ni 11-15 chhunga hman kaltlanga intihsiakna hrang hranga tithate hnenah Khuallian I&PR Minister Pu Lalruatkima'n lawmman a sem nghal bawk a ni.