1903/2023-2024

Aizawl, the 15^th September 2023 : Vawiin khan Science Promotion Wing, SCERT chuan school zirlai naupang tan State Level Science Seminar 2023, Buhtun (millets) chungchang ‘Millets – A super food or a diet fad?’  tih thupui hmangin an buatsaih.

42^nd State Level Science Seminar a khuallian Pi Zohminliani, Director SCERT chuan Mizo ten hun rei tak ata kan lo neih ‘Buhtun” (millets) seminar thupui atana hman anih  chu thil tha tak nia sawiin, buhtun chu hriselna atana pawimawh chaw tha chi hrang hrang pai tam leh hun rei tak vawn that theih a nih thu a sawi a. Science & Technology khawvel a kan chen mek thu sawiin, a tha zawnga zirlai leh zirtirtu ten kan hman a pawimawh thu a sawi lang.

District hrang hrang atanga pakhatna theuh ten an district aiawhin he seminar-ah hian an tel a, District 8 atangin zirlai naupang 8 an tel a. Mizoram University leh Science Promotion Wing, SCERT atangin mithiam ten endik hna thawkin, an kal leh zelna tura atana thurawn leh thil pawimawh sawina hun an nei. State level a pakhatna hian Mizoram aiawhin 12^th October, 2023, National Science Centre, Pragati Maidan, New Delhi a neih turah a tel dawn a ni.

State Level Science Seminar a 1-na chu Emily Malsawmzuali, St. James School, Chawlhhmun niin 2-na chu Colbie R. Lalhriatpuii, Marian High School, Serchhip a ni a. 3-na chu Lalramdinfela, Baptist Higher Secondary School, Serkawn, Lunglei a ni a. Best Guide Teacher ah P. Lalpekhlui St. James School, Chawlhhmun chu thlan a ni bawk.

SCERT hian Science zirna tih hmasawn nan leh chawi nun nan kawng hrang hrangin -Science Exhibition, Science Drama, Incentive Cash Awards, Training, Laboratory/equipment sem, etc… hmangin hma a la thin a. Science zirna tih hmasawn nan leh zirlai naupang te tana an thiamna leh theihna phochhuahna remchang tak a siam a ni. Student Science Seminar pawh hi kum 1979 atang khan kum tin District level-ah leh State level-ah buatsaih thin a ni.