1904/2023-2024

Vawiin khan School Education Minister Pu Lalchhandama Ralte chuan Kolasib College venga Chawnghmingliani Memorial High School Silver Jubilee lawmna College Veng YMA Hall-a neihah khuallian niin a hmanpui a, Food & Civil Supply Minister Pu K.Lalrinliana chuan Uaptu niin a hmanpui bawk.

Pu Lalchhandama Ralte chuan he Silver Jubilee lawmnaah hian thusawiin sorkarin zirna hi ram leh hnam dinchhuahna a ni tih a hria a, sum harsatna karah zirna tihhmasawn nan a thawk zel a, hma lam panin a kal zel, sorkar hi  buaipui tur dik takah a in sengso ngam a ni a ti. Hmasawnna dang hi chak takin kal mah se, mihring berin hma kan sawn loh chuan awmzia a awm lo tih sorkarin a hria a ti a. Khawtlangin sikul an din, hun rei tak an lo hahpui tawh te pawh chhawng zangkhai nan a theih ang angin sum leh pai thlir chungin thutlukna siam a ni dawn a ti bawk.

School Education Minister chuan quality education atan hmalak a nih dan a sawi a. Zirtirtu hna lakah a thiam leh tling te lak an ni a,  Syllabus pawh CBSE milin siam a ni bawk a, heti chung hian All India entrance exam-ah kan la sang thei lova, sorkar mai bakah chhungkua leh khawtlangin țanlak a ngai a, zirna hi a lailum luahtir a ngai a ni a ti.

Pu Lalchhandama Ralte chuan  Pi Chawnghmingliani a vanglai  taka boral hriatreng nan a pasal Pu HD Lalgmangaiha'n sikul țha tak a din chu fakawm a tih thu a sawi a. Kumina India ram chawimawina sang National Award to Teachers dawngtu Pu Lalthianghlima Govt. Diakkawn Kolasib HS chu lawmpuina a hlan bawk. 

Pu K.Lalrinliana Food & Civil Supply Minister pawhin thusawiin zirlai lo ni tawh puitling tak tak, ram tana hnathawk mek, Doctor, Pastor, Officer, Sumdawng hlawhtling tak tak hmuh tur an awm chu a ropui a khawtlang tan a vanneihthlak hle a ni a ti. Pu K.Lalrinliana chuan state-in sum leh pai harsa tak kara School Education Minister-in zirna a kalpui dan chu lawmawm a tih thu a sawi a, zirnaah khawtlang nena țanrual a pawimawhzia a sawi bawk.

Kolasib District Education Officer Pi K.Lalsiamliani pawhin thu a sawi a, Quality Education ngai pawimawha lehkha zir a țul thu a sawi a, Board Exam result țha piah lamah nun quality a pawimawh zia a sawi.

Chawnghmingliani Memorial High School hi February 3, 1998 khan din a ni a, a tirah Nusery ațanga Class VI thleng hawn a ni a, kum 2003 ațang khan Board Exam an hmachhawn. Kum 2005-ah Lumpsum Aided-ah hlankai a ni a, kum 2008 ah High School chin chu Adhoc Aided-ah hlankai leh a ni a, kum 2009 ațangin High School-ah chauh insawrbing a ni. Tunah hian Headmistress leh thawktu 8 an awm mek a, zirlai 103 an awm mek bawk. Kum 2023 HSLC Examah zirlai 40 exam-ah 37 an pass a ni.

CM High School Silver Jubilee lawmnaah hian Minister te bakah School Education Department-a thawk officer thenkhatte,  he school-a thawk tawh leh zir chhuak tawh te, zirlai ni mek te,  zirtirtute leh khawtlang hruaitute an tel a ni.