4039/2022-2023

Khawzawl, 30th March 2023: Deputy Chief Minister Pu Tawnluia, Tuichang AC bialtu MLA ni bawk chuan vawiin khan Lal Nikuala Lungphun Hawn leh Chawngtlai Khawchhuak Hawrunpui chu khuallian niin a hmanpui a. Chawngtlai Welfare Committee (CWC) leh Mizo Historical Village Society (MHVS) te lehkhabu buatsaih ‘Lal ropui Nikuala leh Chawngtlai Khua’ chu a tlangzar nghal bawk a ni.

Lal Nikuala Lungphun hawn puala inkhawm Lal Nikuala Hall, Chawngtlaia neihah hian Deputy Chief Minister chuan Chawngtlai khawchhuak leh khawchhunga cheng mek te tha taka an infawmkhawm chu entawntlak a tih thu a sawi a. Inpumkhatna tha leh thawhhona tha nei zel turin a chah nghal bawk a ni. Lehkhabu pahnih - Lal Nikuala lungphun hawn, Chawngtlai khawchhuak haw runpui leh Pi Pu Chhuahtlang hawn puala souvenir ‘Chawngtlai Par’ leh ‘Lal ropui Nikuala leh Chawngtlai khua’ buatsaih ani chu lawmawm a tih thu sawiin nakin zelah pawh thangtharte tana lehkhabu rotling, Mizo hnam chanchin chhuilet theihna tur lehkhabu hlu leh tha an ni, a ti.

Lal Nikuala chu Mizo hnam thinlung pu mi leh hnam hmangaihtu dik tak a ni Deputy Chief Minister chuan a ti a. Sapho awpbehna kara Mizo ram leh hnam humhalh tura a beihna leh hnathawh te chu mizo hnam chanchinah hriatreng a ni dawn, a ti bawk. Lal Nikuala lunghahna Alipore Jail chu a ho a tlawh a duh thu sawiin kalkhawmte chu Lal Nikuala hnungzuia Mizo hnam hmangaihna thinlung pu theuh turin a sawm bawk a ni.

Deputy Chief Minister hian Lal Nikuala Lungphun bula Lal Nikuala ro leh sulhnu te phochhuahna tur ‘Nikuala Tungchaw’ sak chhunzawmna atan cheng nuai khat a hlan nghal a. Lungphun, Souvenir leh haw runpui buatsaih nan cheng nuai 10 a lo hlan tawh bawk.

Chawngtlai khua hi February ni 21,2014 khan ‘Mizo Historical Village’ ah puan a ni a. Khaw malkhaia Mizo pi leh pu te sulhnu awm tamna ber ni a ngaih a ni. Vawiin a hawn tak Lal Nikuala Lungphun hi feet 28 a sang, kil thum nei a siam a ni a. Heng kilthumah te hian Lal Nikuala chanchin thulakna rintlak tak tak atanga lakkhawm te tarlan a ni.

Lal Nikuala Lungphun hi June ni 18,2015 khan Assembly Speaker Pu Lalrinliana Sailo, khatih hunlaia Tuichang AC bialtu  in lungphum phumin a hmunhma laihzawl hna hi thawh tan a ni a.  Deputy CM Pu Tawnluia, Assembly Speaker Pu Lalrinliana Sailo, Art & Culture Department,MHVS,CWC leh mi inphalte hnen atanga pawisa hmuh hmangin siam zawh a lo ni ta a ni.

Vawiin inkhawm hi Khawzawl DC Pu CC Lalchhuangkima  chuan a kaihruai a. Khawzawl Additional DC Pu Lalfakzuala bakah Mizo Historical Village Society, Chawngtlai Welfare Committee, Lal Nikuala thlah aiawh  ten thu an sawi bawk a ni.