3775/2022-2023

Khawzawl, the 7th March, 2023: Mizoram Upa Pawl (MUP), District Hqrs Khawzawl Assembly vawi 2-na, Zuchhip Branch YMA Hall-a hman chu vawiin chawhma dar 11 khan Deputy CM Pu Tawnluia chuan khuallian niin a hmanpui a, MUP District Hqrs. Khawzawl hnenah tanpuina sumfai Rs 30,000/- a hlan.

Khuallian Pu Tawnluia chuan MUP District Hqrs. Khawzawl Assembly hmang tura upa pawl member kalkhawmte chibai a buk a. Tuichang bial mipuite kutkawih ngeia District thar piangah a kentel hmasawnna hrang hrangte siam chhoh mek zel a nih thu sawiin, Sawrkar lama hmasawnna ruhrel hrang hrangte bakah NGO leh pawl dangahte pawh thil thar hmuh tur a awm chho ve zel a ni, a ti a. District thara hmasawnna ruhrel siam leh cheibawl kawngah Sawrkarin theihtawp a chhuah mek zel thu sawiin, Sawrkar Pisa leh thawktu turte pawh ngaihtuah zel a nih thu a sawi a. MUP member ni thei tura Pathianin taksa leh rilru damna leh hriselna min pek hi a hlu hle a, MUP member nih chu hreh lova, lawmna tur leh Pathian malsawmna dawn avanga lawmthu sawina tur zawk a ni, a ti a. Vanglai hunte pela upat ni hun hmang theia kan dam hi kan vannei takzet a, Pathian hnena lawmthu sawi mawlh mawlh tur kan lo ni, a ti bawk.

Deputy Chief Minister chuan kum upate hlut thiam leh zah thiam a pawimawh thu sawiin, Khawzawl District-in upa thahnem tak a nei chu lawmawm tiin, khawtlang leh kohhran rawngbawlna kawnga thawh hlawk tak an ni thin chu fakawm a tih thu a sawi a. Upa pawl zinga tel nuam a tih thu sawiin, mamawh an neihte a hnena thlen hreh lo turin a chah a. Taksa chaklohna avanga engmah ti thei lo tura indah ringawt chu a fuh ber loh thu sawiin, finna leh remhriatna Pathianin min pek hi kan hmang tangkai thei a, tar chhia/tar at tih tawngkam hi kan hmang ve tur a ni lo, a ti a. Phak tawk leh theih tawk erawh hriat a tul thu sawiin, tangkai theihna kan la nei a ni tih hriaa nun kan hman a ngai a ni, a ti a. Kalkhawmte chu an tawn hriatte chhawr tangkaia thalai zawkte thurawn petu leh midangte tana malsawmna nih tum hram hram turin a sawm a. Indahhniam bik mai lo tur leh, a eng zawnga thil thlir thiam zel turin a chah bawk.

He hun hi Pu K.Roliana, President, MUP District Hqrs. Khawzawl chuan kaihruaiin, Pastor David Saithuama Pachuau-in hunserh a hmang a. Financial Secretary Pu R.Rengkhuma hnen atangin sum dinhmun ngaihthlak a ni a. MUP District Hqrs. Khawzawl Secretary Pu H.Zakamlova tarlan danin tun dinhmunah District Hqrs. MUP hnuaiah Area 6 leh Branch 45 te awmin, member mipa 1,885 leh hmeichhia 1,974, an vaiin member 3,859 an awm mek a ni.

Chawhnu lamah palai rorel inkhawm neih niin MUP Area hrang hrang a?anga agenda lut 5 chungchangte ngaihtuah a ni a. Sub-Hqrs YMA Khawzawl OB te kaihhruaiin kum 2023-2025 chhunga hruaitu turte thlan a ni a, Pu K.Lalzika, Vice President-in lawmthu sawina hun a hmang bawk.

Deputy Chief Minister hian tukin khan Khawzawl khawpui chhunga Sawkar hmalakna hrang hrang; DC Office, DRO Office, DUDO Office, District Veterinary Hospital leh DEO Training Hall sak mek te, SASCI leh SEDP kaltlanga inkalpawhna kawngpui thawmthat mekte bakah Electric Veng PHED Complex-a Mizorama Outdoor Basketball Court PP Tile phahna hmasa ber ni tura hmalak tawh chinte a enfiah a. Hnathawktu leh viltute khaihlak lova hna tlo leh tha, a hma thei ang bera zo thei tura tan la turin a chah a. Vengthar MUP leh MHIP In sakna tur hmunhmate a enfiah bawk a. Heng bakah hian Khawzawl khawpui atanga NH06 kal pawhna tur remchangte a enfiah bawk a; Official leh khawtlang hruaitute chu ram neitute rawn chunga zirchianna leh inrawnkhawmna zau zawk nei hmasa turin a chah a ni.

Deputy Chief Minister Pu Tawnluia chuan vawiin chawhnu khan Zuchhip khaw hmun hluia ruihhlo ngaite enkawlna hmun Chhanchhuahna Home pawh tlawhin thawktute nen inkawmhona hun an hmang a, tanpuina sumfai Rs 20,000/- a hlan a ni. Hemi hnu hian Hmuncheng khua tlawhin Community Hall-ah vantlang inkhawm a hmanpui a; khawtlang mamawh leh tul angte sawiin inkawmhona hun hman a ni a, hmalak dan turte pawh ngaihtuahho a ni bawk.

PHE Department hmalaknain Hmuncheng khuaah hian JJM hnuaiah cheng nuai 194.64 sengin Hmunpui lui tui gravity hmanga lak hna thawh mek a ni a. Hna hi za zela 80 dawn zawh fel tawh niin kumin March thla chhunga zawh hman beisei a ni a. JJM kaltlang hian khaw chhunga in tinah tui connection pek kim tawh niin, tuizem lian litre 35,000 dawng siam zawh tawh a ni bawk.