851/2023-2024

Aizawl, the 20th June 2023 : Vawiin khan Mizoram Deputy Chief Minister Pu Tawnluia chuan Dinthar Vengah Smart Parking sakna tur lungphum a phum. He hunah hian I&PR Minister Pu Lalruatkima, bialtu MLA ni bawk chu khual zahawm a ni a. MLA Pu K Laldawngliana leh Aizawl Deputy Mayor Pu R Thanglura te pawh an tel a ni.

Pu Tawnluia chuan Aizawl Smart City project hnuaia hmalakna pawimawh tak pakhat ‘Construction of on road smart parking’ sakna tur bultan nan lungphum phum a ni ta chu a lawmawm tak zet a ni, a ti a. Bialtu MLA, khawtlang hruaitu Local Council leh YMA te thahnemngaihna te, khawtlang mipuite leh sawrkar tan rualna avangin he hmalakna pawimawh tak hi bul tan a ni dawn ta a ni, a ti. Aizawl khawpuiin a mamawh em em parking tha tak, Mizoram Secretariat bulhnaiah leh Ebenezer Hospital bul maiah dah a ni tur chu tangkai taka hman theih hun tur, he project puitlin hun tur hi a nghahhlelhawm hle a ni, Pu Tawnluia chuan a ti a. Kawr kamah, Tuikual luiin a tan tlang na hmunah sak a nih dawn avangin a ruangam pawh uluk taka duan a ni a, a satu te pawhin uluk leh fimkhur taka, thahnemngai taka an thawh a ngai dawn a ni, a ti. Deputy Chief Minister chuan he parking hmunah hian riahna hmun tha tak, khualbuk anga hman theih tur dah a ni tur hi lawmawm a tih thu sawiin Ebenezer Damdawi ina dam lo enkawltuten an hman tangkai a beisei thu a sawi a. Thalai infiammi te tan futsal ground dah a ni dawn tih a sawi bawk. Dinthar Veng leh a chhehvela sawrkar hmalakna hrang hrang te, Smart City hnuaia sawrkar hmalakna leh hmachhawp te khuallian chuan a tarlang a. Aizawl khawpui chhung hmun hrang hranga sawrkar hmalakna te sawiin a bik takin Smart City Project hian engemawchen Aizawl khawpui hmel a ti danglam dawn a ni, a ti.

Minister Pu Lalruatkima pawhin thusawiin a bial chhung Dinthar khawtlangin nghakhlel taka an lo thlir tihpuitlina a awm chho mek chu lawmawm a tihzia a sawi a. Vawiin hi Dinthar khawtlang tan ni chhinchhiahtlak leh ni lawmawm tak a ni, a ti. Dinthar khawtlangin he project a puitlin theih nan Thlanmual ram zau tak an satthla a, sawrkar ram MINECO huamchhungah GAD in ram zau tak a pe bawk a, an chungah a lawm tak zet thu a sawi a. He project hi a hun takah tha taka thawh zawh a nih a, veng mipui leh a mamawhtu apiang ten tangkai taka an hman a beisei thu a sawi a ni. Dinthar Veng chu veng inpumkhat leh tangrual, veng hmasawn leh entawntlak nia a hriat thu Minister chuan a sawi a. Sawrkarin hma a lakna te, a hmachhawp te tarlangin sawrkar thlawp tlat zel turin mipuite a sawm a ni.

Deputy Mayor Pu R Thanglura pawhin lawmthu sawiin AMC Ward XII bialtu a nih ang leh Dinthar vengpa a nihna angin sawrkar hmalaknaah lawmawm a tihzia a sawi a. Aizawl City Center leh AMC office te pawh Dinthar vengah hian sak tura ruamhmanna siam mek a nih dan pawh a sawilang a ni.

‘On road smart parking’ site area hi 3274.6sqm a zau a ni a. Sum sen tura ruahman hi cheng vaibelchhe 13.38 a ni a. Contract agreement hi kumin February 11 ah ziah a ni a. June 30, 2024 ah thawh zawh hman tura ruahman a ni. Basement I ah Lirthei ke pali nei 52 leh ke pahnih nei 45, belkhawmin 97 dah theihna siam a ni a nga. Basement II ah mikhual thlen theihna dormitory, 4 bedded room pahnih, 2 bedded room 2 leh VIP Room pakhat a awm ang. A chung berah hian Futsal Ground siam a ni dawn a. He Futsal Ground erawh hi chu Dinthar YMA in a sak hna leh a sakna senso zawng zawng an tum thung dawn a ni.