247/2023-2024

Sialhawk, 28th April, 2023 : Deputy Chief Minister Pu Tawnluia chuan vawiin khan Sialhawk Community Hall-ah "Sub-Headquarters YMA, Khawzawl Inkhawmpui Vawi 1-na" a hmanpui.

YMA member kalkhawmte hmaah thu sawiin Pu Tawnluia chuan Khawzawl Sub-Headquarters kan nei ta leh inkhawmpui hmasa ber kan nei thei ta hi a lawmawmin hmalam panin ke kan pen zel tih a lan tir a ni, a ti a. Zoram mipuite leh kan khawtlangin YMA kan tangkaipui zia hi sawifiah sen a ni lova, an tangkaizia hi sawrkar pawhin a hria a, a ngai pawimawh hle thin a, ram leh hnam tana tha tur leh hmasawnna tura YMA thawhpui kan tumna ah an tlanchhe ngai lo hi an fakawmin an thlamuanpuiawm takzet a, mahni ropuina leh hlawkna tur ni lova, midang tanpuingaite tanpui leh chhawmdawl tura din an nihna an thlahthlam lo hi an zahawm takzet a ni, a ti.

Khuallian chuan YMA memberte chu an awmna hmun apiangah kan hnam nunphung, nihphung leh ziarangte chawinung zel turin a chah a, ruihhlo do kawngah tha kan thlah thiang lo tin sawiin, kan tu leh fate bakah keimahni tan pawh a ni tel tih hria a beidawng lo leh tha thlah lova theihtawp kan chhuah tlan tul takmeuh tih sawiin, ruihhlo do kawngah tha taka thawhho puiah a sawm bawk a ni.

Pu Tawnluia hian Ph. D zirlai Nl. Lalsiammawii d/o Laltlanliana, Sialhawk hnenah laptop a hlan a, Khawzawl Sub-Headquarters YMA khawmpui senso phuhruk nan Rs. 3,00,000/- hlanin Sub-Headquarters YMA office zauhna tur pawh theihtawp chhuaha tanlakpui a tum thu a sawi a ni.

Sub-Headquarters YMA, Khawzawl hnuaiah hian YMA Branch 41 awmin YMA Group 4 (Nikuala Group, Tuichang Group, Kawlkulh Group, Tuichangral North Group) a awm a, Sub-Headquarters YMA office hi Khawzawl Dinthar vengah neiin, tun dinhmunah member 19299 (Mipa - 12067, Hmeichhia - 7232) an awm mek a ni.

Vawiin vantlang inkhawm hi Khawzawl Sub-Headquarters YMA Vice-President Pu C. Lalhmingmawia'n a kaihruai a, nikum Sub-Headquarters YMA, Khawzawl rorel inkhawm neih hnu a an member boral mi 122 (Mipa - 103, Hmeichhia - 19) sunna hun an hmang bawk a ni.

Chawhnu lamah Central YMA hruaitute kaighruaina hnuaiah kum 2023-2025 chhunga an hruaitu tur an thlang bawk a ni.

Sub-Headquarters YMA, Khawzawl Inkhawmpui vawi 1-na hi April ni 26, 2023 (nilaini) zan a tan niin, zanin hian a tiak ang.