248/2023-2024

Ṭau thla ni 28, 2023: Vawiin khan Don Bosco School Hall, Lawngtlaiah Mizoram Board of School Education (MBSE) buatsaihin Lawngtlai District chhunga MBSE Affiliated High School leh Higher Secondary School zirtirtute tan zirlaite'n mahni ngaihtuahna an sen aṭanga an chhan ngai chi zawhna siam dan tur chungchangah "capacity building of teachers in setting higher order thinking skills (HOTS) question" tih thupui hmangin ni khat awh training buatsaih a ni.

He hun hi Lawngtlai District Education Officer Pi R. Lalnunthari chuan a kaihruai a. Training hi MBSE Regional Officer Pu Rangkhuma leh MBSE Academic Officer Pu F. Ricky Lalremruatpuia te'n an pe a. Lawngtlai District chhunga High School leh Higher Secondary School zirtirtute an tel ṭha hle a ni.

MBSE chuan kum 2020 HSLC Ieh HSSLC exam aṭang khan exam dan kalphung leh zawhna zawh dan thar a hmang ṭan a. Hemi hian a tum ber chu content-based question aṭanga competency-based question tam zawk zirlai naupangte tana chhawp chhuah niin, hemi atan hian District 11-a zirtirtute tan training "Question Setting Technique" tih thupui hmangin buatsaih a ni tawh nghe nghe a. Vawiina training buatsaihin a tum ber chu zirtirtu term exam leh Board exam buatsaih ṭhinte tan HOTS question chu eng ang nge a nih tih leh a buatsaih dan zir ho a ni a. Training hi session hnihah ṭhen niin, session hmasa zawkah chuan Bloom Taxonomy aṭangin lower order thinking skills (LOTS) leh HOTS question zir ho a ni a. A session hnuhnung zawkah chuan subject hrang hrang aṭangin HOTS question buatsaih chhin a ni.

He training-ah hian National Education Policy (NEP) 2020 chungchang te, Class IX leh X Science leh Mathematics bilingual textbook chungchang te sawi zauna hun bakah, MBSE-in Scheme of Examinations and Question Design a hman mek, Integrated Evaluation Scheme (IES) leh application software chungchang inhrilh thar lehna te neih nghal a ni bawk.

Rote memorisation emaw, LOTS hmanna lam hawi ringawt zawhna ni lo, higher order thinking skills lam hawi, naupangte'n an ngaihtuahna tun aia an sen lehzualna tur hi NEP-2020 rawn chhuak chuan a ngaih pawimawh avangin, heti ang training hi district hrang hranga MBSE affiliated school tan buatsaih vek turin ruahman a ni.