249/2023-2024

Champhai, the 28th April, 2023: NABARD (RIDF-XXVI) 2020-2021 atanga sum hmuh cheng nuai 268.99 senga sak, Bungzung Primary Health Centre Building thar chu Health Minister Dr. R. Lalthangliana'n tukin dar 9 khan a hawng. Minister hi East Tuipui bialtu MLA Pu Ramthanmawia, Vice Chairman, Bamboo Link Road Board leh Health Department hotute'n an tawiawm a ni.

PHC Building thar lawmna pual inkhawm Bungzung Community Hall-a hmanah Khuallian Dr. R. Lalthangliana chuan Bungzung PHC Building thar chu tha a tih thu leh sum awm ang angte daihzai taka hman a ni chu fakawm a ti a. Staff Qtrs, a panna kawng leh mamawh dangte pawh a tul ang zela ngaihtuah tum a nih thu a sawi a. Sesih PHC hun reiloteah sak tum a nih thu leh, Khawbung PHC pawh sakthat tum a nih thu a sawi a. Hriselna chu hmasawnna tura pawimawh leh kawngro sutu a nih vangin ngaih pawimawh zual a ni, a ti. Heath Care Bill-te pawh hun reilote hnuah engemawzah suatkian theih beisei a nih thu tarlangin, Asian Development Bank atangin health care bill atan vaibelchhe 1000 hmuh beisei a ni a, a hlawhtlin hunah health care bill tangte tihfel vek beisei a ni, a ti bawk a. Health Minister chuan JICA nena tangdunin Zemabawkah cheng nuai 70,000 senna tur Cancer Superspeciality Hospital din tum a nih thu leh, kum 2028 ah zawhfel hman beisei a nih thu a sawi bawk.

Hripui leng leh harsatna hrang hrangte avanga hmasawnna a chawlh thuap lai leh, hmasawnna ruhrel siam kawnga khaihlak a awm hnua hnathawh theih hun reilote chhunga hmasawnna hmuh tur a awm chho zel chu lawmawm a tih thu a sawi a. Hripui leng do kawnga theihtawp chhuaha tanrual a ni chuan thawhhona that zia a lantir a ni, a ti a. Tunhnaiah Champhai District mipuite tan Champhaiah Urban PHC, rikrum thila damlo enkawlna Trauma Centre, RT-PCR Laboratory leh naupang ICU te hawn a nih thu sawiin, District Hospital Champhaiah natna khirhkhan bikte uluk taka enkawlna, khum 50 awmna tur Critical Care Block (CCB), cheng nuai 2000 senga sak tum a nih thu a sawi a; hei hian Hospital Building mai nilo hmanraw tha leh changtlung zawk a kengtel dawn a ni, a ti a. Champhaiah Nursing School ataka kalpui thuai a nih theih nana hmalak zel a nih thu a sawi bawk a. District thara Hospital-te cheng nuai 1700 senga sak that tum a nih thu leh, Health Clinic-te cheithata hmanraw mamawhte dah vek tum a nih thu a sawi bawk.

Commerce & Industries Minister ni bawk chuan ramri insumdawntawnna Sawrkarin a ngaihpawimawh thu sawiin, Zokhawthar Land Custom Station tihchangtlun nan cheng nuai 1500 senga hmalak mek a nih thu leh nimin lamah hmalaknate a enfiah thu a sawi a. Tunhnaia India rama Border Trade lian tham kalpuina tur hmun 25 thlan chhuah zingah Zokhawthar leh Zorinpui te a tel chu lawmawm a tih thu sawiin, Mizoram tana chhawrnahawm tak tur a ni, a ti bawk.

Khualzahawm Bamboo Link Road Board Vice Chairman Pu Ramthanmawia chuan sak that mamawh tawh tak Bungzung PHC tha taka sak puitlin a ni ta chu lawmawm tiin, bial tana ni chhinchhiah tlak tak a ni, a ti a. Health Minister, Department hotute, Contractor leh khawtlang hruaitute hmalakna fakawm a tih thu a sawi a. Khawtlang hriselna tura Bungzung PHC Doctor leh thawktute inpekna chhuanawm a tih thu a sawi bawk a. A bial chhunga PHC 4 zinga PHC 2 building thar hawn theiha peihfel a ni leh, Sesih PHC a Doctor awm ngailo dah a ni chu lawmawm tiin, Sesih PHC Qtrs sak mek a ni a, Damdawiin pawh sak thuai tum a ni, a ti a. A bial chhunga Health Sub-Centre te Health & Wellness Centre-ah hlankai a nih bakah Sub-Centre awmlohna khuaa Health Clinic 5 dah a ni chu lawmawm a tih thu a sawi bawk.

East Tuipui bialtu MLA ni bawk Pu Ramthanmawia chuan hmasawnna duhawm tak a awm theih nana thahnemngai taka hma laa bultantute, ram leh hnam leh kohhran din kawnga sulsutute, an hun leh tha tam tak sengtute inpekna ngaihhlutthiam a pawimawh thu a sawi a. East Tuipui bialin harsatna hrang hrang Covid hripui leng, lirnghing, Vawk pul hri bakah thenawm ram buai avanga sahimna zawnga raltlan buaipui tur engemawzah a neih thu leh lungrual taka hmachhawn a nih thu tarlangin, harsatna nasa tak tawh laia NGO, VC, Kohhran, Agency hrang hrang leh mimal thahnem ngai tak takte inpekna leh Sawrkar hmalakna an tawiawm thinnaah lawmthu a sawi a. PHC thawktute chu midang tana malsawmna nih tum tura fuihin, PHC Building hawn thar chu taksa leh rilru damna hmun a nih ngei a beisei thu a sawi bawk.

Thusawitu dang Dr. Eric Zomawia, Mission Director, National Health Mission (NHM) chuan Niti Ayog health assessment-ah Small State zinga titha berah Mizoram kum 4 chhung thlan a nih thu leh, nausen kum khat hnuai lam thi tlem berna State-ah azawna kum hnih chhung thlan a nih thu a sawi a. Sawrkarin thingtlanga chengte hriselna a ngaih pawimawh thu sawiin, Health Sub-Centre 379 zinga 305 te Health & Wellness Centre-ah hlankai tawh a ni, a ti a. Hengte hmang hian natna inkaichhawn theih loh Non Communicable Diseases (NCD) an tih mai heng; thisen sang, zunthlum, cancer leh adangte'n nghawng thalo zawk a thlen loh nana hmalakna zau zawk kalpui tum a nih thu a sawi a. Heng bakah hian hriselna kawnga inzirtirna leh hmalakna dangte zau zawka kalpui tum a nih thu a sawi bawk.

A hawnna pual inkhawm Bungzung Community Hall-a hman hi Dr. Vanlalsawma, Director of Health Services chuan kaihruaiin Rev. T.Rosangliana, Vanzau Pastor Bialin hunserh a hmang a. Pu Laltlansanga, Bungzung Branch YMA President-in kalkhawmte lawmna thu a sawi a. Er. Lalremruata, Sr.EE, Project Division-III, Aizawl-in technical report a pe a. Pu Goldena, VCP Bungzung hnen atangin thusawi ngaihthlak a ni bawk a. Dr. P.C Lalhmingliana, CMO Champhaiin lawmthu sawiin hun hman a khar a ni.

Bungzung PHC Building thar hi NABARD (RIDF-XXVI) 2020-2021 sum cheng nuai 268.99 senga sak niin, contractor hi Ngurzamlova, Kolasib a ni a. Hna hi December ni 13, 2021 ah tan niin, June ni 13, 2023 a zawh hman tura bituk chu April ni 24, 2023 ah zawhfel hman a ni. He hna hian a kentel work component 5 a nei a ni.

Bungzung PHC Building thar hi zopa chhiara chhawng hnih a ni a. Ground Floor hi square metre 1762.42 a zau niin, room hrang hrang 19; Allopathy Clinic, Ayush Clinic, Minor OT, Delivery Room, Preparation Room, General Store, Waiting Area, Kitchen, Male Ward, Female Ward, Nurse Dressing and Rest Room, Register Cum Dispensary, Laboratory, Casualty, Office, Opthalmic Assistant Room, X-Ray Room, Dark Room leh Toilet-te a awm a. First Floor hi square metre 84.30 a zau niin, room 2; Main Centre leh Conference Hall-te a awm bawk a ni. Avaiin room 21 awmin, square metre 1846.72 a zau a awh a ni.

Health Minister hian tukin khan Mualkawi leh Dilkawn khuate tlawhin khawtlang hruaitute a kawm a. A enkawl Department hnuaia khawtlang mamawh an thlente chu a tul anga lo enzui a tum thu a hrilh. Health Minister hi Law & Judicial Minister Pu T.J. Lalnuntluanga, Champhai South bialtu MLA chuan a tawiawm a ni.