250/2023-2024

Ṭau thla ni 28, 2023: May ni 9, 2023-a Chakma Autonomous District Council (CADC)-a Member of District Council (MDC) Inthlanpui lo awm tura inthlan buaipui tur, sector officer, presiding officer (PRO) leh 1st polling officer (PO) tura ruatte tan nimin leh vawiin khan Govt Region Higher Secondary School, Lawngtlaiah training buatsaih a ni.

Nimina sector officer, presiding officer (PRO) leh 1st polling officer (PO) te tana training buatsaihah Election Officer Pu Daniel Sailo chuan hawnna thu a sawi a. Master Trainer & AERO Pu N. Lalzarzova chuan inthlan kalphung tlangpui (general procedure of election) sawi fiahin, Master Trainer & AERO Pu H. Vanlalbiakzauva chuan inthlannaa hman tur form hrang hrangte a sawifiah thung a. Zawhna leh chhanna leh sawi hona hun hman a ni bawk.

Vawiin khan PRO-te leh 1st PO-te tan bik training buatsaih chhunzawm niin, he hunah hian polling official-te tih tur leh mawhphurhna hrang hrang inzirtir a nih bakah, EVM hman dan leh enkawl dan leh election form hrang hrang hman dan te a taka ti chhinin, zir ho a ni a. Sawi hona leh zawhna leh chhanna hun hman a ni bawk.

Vawiina training tura koh polling official-te hi hmun thumah inṭhen darhin, District Level Master Trainer-te - Pu Samuel Zodinsanga, Pu Hmingmawizuala, Pu N. Lalzarzova, Pu H. Vanlalbiakzauva, Pu Samuel Lalmalsawma Sailo leh Dr Doris Lalrinawmi te'n training hi an pe a ni.

CADC Inthlanpui, 2023-ah hian MDC constituency 20 awmin, a zavaiin polling station 70 a awm a. Polling station tinah hian PRO, 1st PO leh 2nd PO pakhat ṭheuh an awm dawn a. Polling station-te hi sector ṭhen hrang hrang 12 hnuaiah dah khawm niin, sector officer pakhat ṭheuhvin sector hi an vil dawn a. Hei bakah hian a ṭul thulha koh theih tur reserve sector officer, PRO leh PO te ruat an ni bawk.

Ruahman lawk dan chuan May ni 6, 2023 khian Kamalanagar-I Public School, Chawngte 'C'-ah PRO, 1st PO leh 2nd PO te tan final training buatsaih a ni ang.