251/2023-2024

Aizawl, the 28th April 2023 : Vawiin khan Power & Electricity enkawltu Minister Pu R. Lalzirliana’n Bawngkawn South Cultural Centre ah Power & Electricity Department buatsaih Electrical Safety Week a hmanpui. He hun hi Power & Electricity Commissioner & Secretary Pu H. Lalengmawia pawhin a telpui a ni.

Pu R. Lalzirliana chuan Power & Electricity Department chu electric current kaihhnawihah reng reng mawhphurtu an nih angin, a pek chhuahna lam kawng piaha, a inven fimkhurna lamah pawh a thawktu zawng zawng ten tihtak zeta hun leh tha leh rilru an sen a tul thu te a sawi a. Indian Electricity Rules leh, rules & guidelines neih dang te, a hrechiang ber te an nih angin tun aia uar zawkin heng dan leh hrai te chu puanzar a tul thu te a sawi bawk a. Engineering department an nih avangin, a engineering hna ngawr ngawra insawrbing tur tihna a ni lo va tiin kan rawngbawlsak mipui te kan nel thiama, kan zirtir a, kan enkawl a tul tih hi hre thar leh theuh ila tiin a duh thu a sawi bawk a ni.

Power Minister chuan kumtin maia electric kal sual avang te-a in leh lo chan an awm thin chu a pawi tih thu sawiin hemi kawnga hian Awareness kan mamawh tak zeta, awareness bakah, fimkhurna leh himna chhungchanga safety standard hrang hrang an zawm a pawimawh hle a, thil pawi thleng palh thei nia kan hriat reng reng chu, pawi a thlen hmaa action kan lak vat te pawh a tul hle a. A department huam chhungah pawh inenfiah a, tih tak zeta fimkhurna leh himna chungchang kan inzirtir uar a tul a Officer te ringawtin kan hriat a tawk lo va, kan hnuaia thawk te, a hniam ber thlengin kan inzirtir a, kan inhrilh a, kan enzui a ngai a ni, a ti.

Pu R. Lalzirliana chuan Department anga programme neihna apiangah, fimkhurna leh himna safety chungchang chu sawi lang tel zel tura Department a thawkte chu chahin, a sub-division leh district level-ah te pawh, kan department emaw department dangin emaw, NGO te pawhin programme an neih dawn chuan, electric safety chungchang hi zeh tel zel nise tiin a duh thu a sawi a. Electrical Safety hi mipui zawng zawng tana pawimawh a nih avangin, keimahni chauha hma lak tum lovin kan hnathawhna hmuna department dang te leh, khawtlang mipui, NGO te thlengin thawhpuiah sawmin, kan tan tlan a ngai a ni, a ti.

Pu H. Lalengmawia pawhin Department a thawkte chu fuihin kawlpetha hman kawnga fimkhur tura inzirtirna te chu mipuite hnenah tun aia uar zawka kalpui leh hrilhriat a tul thu te a sawi a ni.

Engineer-in-Chief, P&E Pi Lalhmingliani Hmar chuan Electrical Safety Day hman chhan te sawiin Department thawktute infuihna leh kawlpetha hmanna kawnga mipuite fimkhur tura inhrilhhriatna hun atan pawh hman tangkai nise tiin a duhthu a sawi. He programme pualin Department hnuaia Sub-Divisional Office te atan inelna siam a nih dan te pawh sawiin Sawrkar sum bawma sum chungluh revenue target tam lamah te, transmission lamah kawlpetha hlohna tihlem Aggregate Technical & Commercial Loss (AT&C Loss) lamah te leh transformer venhimna lamah thawk tha te a nih thu a sawi bawk.

Finance Department in kum 2022-2023 chhunga P & E Department sum thawkchhuak tura a tuk Revenue Target chu vaibelchhe 600 anih laiin Department chuan he hun chhungin engchhiatna leh thil dang atangin Revenue Target chu khumin sum vaibelchhe 737 lai an thawkchhuak a, hei hi za zelah 122 in an khum a. Chutih laiin Joint Electricity Regulatory Commission (JERC) in hemi hun chhung veka Revenue Target thawkchhuak tura a beisei chu cheng vaibelchhe 403 a ni ve thung a ni.

Pu R. Lalzirliana leh Pu H. Lalengmawia te chuan kum 2022-23 chhunga Sub – Division te tan inelna hrang hranga lawmman late hnenah citation leh lawmman sumfai te an hlan a ni.

Sum chhunluh lamah thawk tha ber chu Revenue Sub Division II Aizawl niin cheng vaibelchhe 157.77 an thawkchhuak a; pahniha leh pathumna chu Mamit Power Sub Division leh Champhai Power Sub Division te an ni. Hmanrua leh thil dang avanga sub station atanga consumer-te hnena kawlpetha a thlen thlenga hlohna hrang hrang Technical & Commercial Loss (AT&C Loss) tihtlem kawmga thawk tha ber chu Champhai Rural Sub Division niin an AT &C Loss hi za zelah 7.46 a ni a; pahnihna leh pathumna chu Mualthuam Power Sub Division leh Mamit Power Sub Division te an ni ve thung.  Transformer venghimna lamah Division 5 chuan kum 2022-2023 chhungin transformer pakhat mah an tichhe lova chungte chu – Distribution Division I Aizawl South, Distribution Division III Aizawl Central, Revenue Division I Aizawl North, Tuipang V Power Sub Division leh Maicham Hydel Project Sub Division, North Vanlaiphai te niin pakhatna an ni vek a. Pathumna leh pahnihna te chu – Kolasib Power Sub Division leh Bungtlang South Power Division te an ni.