252/2023-2024

Aizawl, 28th April, 2023: Vawiin khan Taxation Department chuan an Department Auditorium-ah kum 2022-2023 chhunga Sorkar-in target a bituk an khum chu a lawmna hun an hmang a. He hunah hian Chief Minister Pu Zoramthanga chu khuallian a ni a, Home, Taxation etc. changtu Minister Pu Lalchamliana chu khualzahawm a ni.

Taxation Department hi Mizoram Sorkar tana revenue chhung luttu lian ber a ni a. He Department hian GST, VAT leh Prof. Tax atangin chhiah a lakhawm a. Financial Year 2022-2023 chhunga a tax revenue hmuh zawng zawng hi Rs. 1020.66 Crores a ni a. Revised Estimate ah Rs. 900 Crores hmu tura beisei an nih laiin R.E. target hi Rs. 120.62 Crores in an khum a. State's Own Tax Revenue (SOTR) target Rs. 917.79 Crores pawh Rs. 102.87 Crores in an khum a ni.

State's Own Tax Revenue (SOTR) mai bakah Taxation Department hian Central atanga thla tina Devolution of Taxes and Duties Mizoramin a hmuhah hian contribution sang tak a nei a. GST hman a nih hnu hian tax revenue hi Central GST leh State GST ah inzahsem a ni a. Taxation Department hnuaia GST registration neite hian chhiah an pekin CGST leh SGST hi 50-50 basis in an pe a. Hetah hian SGST bik hi chu Mizoram State Sorkar sum bawmah a lut nghal a. CGST erawh hi chu Central Sorkar sum bawmah Central Taxes leh Duties dangte nen a lut khawm a. Heta tang hian a chunga kan sawi Tax Devolution hi Mizoram Sorkar-in a lo hmu let ve leh thin a ni.

Chief Minister Pu Zoramthanga chuan vawiin programme chu sawrkar leh state tan thil lawmawm tak a nih rhu a sawi a. Thawktute thahnmengaihna chungah lawmthu sawiin, midangte tan entawntlak a ni tiin hma sawn zel turin a chah bawk. Taxation department thawktute bulah chuan Mizoram sawrkar sum dinhmun hriatthiam pawimawh a tih thu a sawi a. Hun pangngai (normal period)chu ni se Budget system ang chuan state in hmasawnna hna awlsam taka thawh theih a nih laiin hripui leng avangin budget pawh a lo innghah vek tawhna state sum hmuh chu hrek a nih tak thu a sawi a. Sum hnar dang bakah sum hmuhna innghahna lian ber share of taxes chu a tlakhniam tak vek avangin leh chu sum kan hloh chu tun thlenga rulhna hmuh let a awm loh avangin hripui leng boruak a ziaawm hnu ah pawh sum harsatna hi a la inzui zel thu a sawi a. Share of taxes tihhniam avanga kan hmuh tur awm kan hloh tak chu cheng vbc 3000 aia a tam ngei a rinawm thu a sawi a. Chief Minister chuan hmasawnna hna thawhna tur atan chuan sawrkar laipuiin development fund tam tak a kawl, project hmanga haichhuah tur a neih chu a pawimawh thu a sawi bawk a. Chung fund sanction chu state in a lo do let vena tur chu state sum a awm a, a zuk thalchhuah lamah tan lak a pawimawh thu a sawi a. Tax atanga sum lakluh pawh hmalak zel a pawimawh thu sawiin, tunah resource mobilization kawnga hmalak a nih dan t a sawi.

Khualzahawm Minister Pu Lalchamliana chuan Taxation Department thawktu zawng zawng chungah lawmthu a sawi a. Department thawktute theihtawp an chhuah thin avangin lawmthu a sawi a, chutihrual chuan contractor te GST pe lo an awm tih thu newspaper report hmuh tur a awm te chu tan lak ngaihna a ni a ti a. GST in register awm, in register lo sawi tur an awm thin te chu awareness lama hmalak a tulna tilangtu a nih thu a sawi a. Mipuiin kan mawhphurhna kan hriat hi a pawimawh tel ve a ni a ti. Minister chuan department hmasawnna chungchangah sawrkarin department tan Addl. Commissioner leh Dy. Commissioner post pakhat ve ve a pek avanga lawmthu sawiin, district thara office nei tura hmalak mek a nih zel thu a sawi bawk a. Infrastructure lamah district thenkhat a phuisui viau laiin district engemawzat ah office building tihchangtlung ngai a la awm thu te a sawi bawk a. State sum dinhmun in a zir chuan hmasawnna atan state changkang zawkte tih dante zirchiang a intirh a, hlawk zawka thawh leh phurna thar pawh thlen ngei a beiseiawm thu a sawi bawk.

Taxation Principal Secretary Pu Vanlal Chhuanga pawhin he hunah hian thu sawiin, Taxation department hnathawh that chungchangah lawmthu a sawi a, hmasawn zel erawh a pawimawh thu a sawi. 15th Finance Commission in revenue deficit grant state in a dawn thin chu kum tin a tihhniam zel thu sawiin, heihi sawrkar laipuiin state te sum thawkchhuak tam ve tura mi duh vang a ni a ti a. Revenue receipt atan taxation tluka kan innghahna lian a awmlo a ni tiin taxation department thawktute chu theihtawp chhuah zel turin a chah a ni.

Vawiin programme hi Pu R. Zosiamliana, Commissioner of State Tax chuan a kaihruai a, Pu David Lalchhuanawma, Joint Commissioner of State Tax in revenue collection chungchang report a pe. He programme hi Finance Department hotute leh Taxation Department atanga superannuation pension a chhuak Tax Officer lo ni tawh thinten an hmanpui bawk a. Inkhawm hi Pu HK Lalhawngliana, Additional Commissioner of State Tax in lawmthu sawiin a khar a ni.