246/2023-2024

Kolasib dated 27th April 2023: 'Ram leh hnam humhalh' tih thupui hmang a Lungdaia Young Mizo Association Sub-Headquarters, Kolasib Inkhawmpui vawi 7-na, April ni 25 atanga hman țan chu zanin khan 'Palai thlahna inkhawm' neih a ni a. Pu K.Lalrinliana, Minister, Food, Civil Supplies & Consumer Affairs Department chuan khuallian niin a hmanpui a, Pu K.Laldawngliana, MLA, 4-Turial Assembly Constituency bialtu chu khual zahawm a ni bawk.

Khuallian Minister Pu K.Lalrinliana chuan mizo khawtlang min phuar khawmtu pawl pawimawh ber chu YMA a nih thu sawiin YMA thil tum tihlawhtlinna chuan khawtlang nuam leh intluktlang a thlen ngei a rin thu a sawi a. Sawrkar țha siam kawng ah pawh a țul hun a khalh ngiltu leh thurawn petu pawimawh tak an nih avangin inrelbawlna țha siam nana hmanraw pawimawh tak an nih thu a sawi. Khawtlang thlamuanpui tham ni turin YMA member-te chu YMA thil tum nunpuitu ni turin a chah a, țanpui ngaite țanpui a, nun kawng dik zawh tur a țhalaite kaihruaitu ni turin Minister chuan YMA hruaitute chu a chah bawk a ni. Hnam ropui leh zahawm ni tur chuan induhsakna leh inlungrualna hmang a hmun hrang hrang a zohnahthlak awmte nen inunauna țha siam a pawimawh thu sawiin hemi kawnga YMA hmalak țhinna chu fakawm a tih thu a sawi bawk a ni.

Pu K.Lalrinliana chuan mahni inchhungkhur, mahni khawtlang leh ram tan a kawng engemaw tal a țangkaina nei tur a ngaihtuahna sen a țul thu sawiin tunlai thiamna nasa tak a țhang mek chu chhawr thiam a, kan ram leh hnam hmasawn nana hmang thiam turin kalkhawmte a fuih a. Ruihtheih thil chu ram leh hnam hmelma a nih angin YMA member-te chu heng ruihhlo lak a fihlim tur a chahin ruihhlo do hneh tur chuan mahni țheuh a pawimawh hmasak thu a sawi. Intodelhna chuan zahawmna a ken tel thu leh mahni intodelh tur a țan lak a țul thu sawiin mahni phak tawk zel ah intodelh tur a ke pen turin leh ram leilung hausakna humhalh kawng a hma la turin Pu K.Lalrinliana chuan inkhawm chhimtute chu a chah bawk a ni.

Khual zahawm Pu K.Laldawngliana, MLA, 4-Turial Assembly Constituency chuan YMA member-te chu a taka tlawmngaihna nunpuitu ni turin leh mahni intodelh tur a taimakna leh tumruhna lan chhuah tirtu ni turin kalkhawmte a fuih a. Hnam hmasawn nan leh humhalh nan ruihhlo hman sualna lak a fihlim turin leh HIV lak a fihlim tur a nun uluk tak a hmang turin a chah bawk a ni. Zirna kawnga hlawhtlinna tak chherchhuak turin thiamna chhawrtlak zirchhuah a pawimawh thu Pu K.Laldawngliana chuan sawiin zirlaite tan pawl hrang hranga inhman dan tawk thiam a țul thu a sawi.

Pu Thomas D.Lalengliana, President, Sub-Headquarters YMA, Kolasib chuan YMA hruaitute chu a tak a thawk chhuak a mawhphurhna hlenchhuak tur a mi rintlak leh zui tlak a awm tur an nih thu a sawi a, țanpui ngaite țanpui tur a penchhuah kawngah mite tan a entawntlak an nih a pawimawh thu a sawi. Kolasib district chhunga inkalpawhna țha a awm theih nan NHIDCL kaltlang a 4-lane kawng siam tur a hmalakna chu Mizoram tan a hmasawnna nasa zawk thlentu tur a nih thu sawiin mumal tak a hmalakna enpui chunga chak lehzual a heng hmalaknate hi tihhlawhtlin a țul thu President, Sub-Headquarters YMA, Kolasib chuan a sawi.

YMA Sub-Headquarters, Kolasib inkhawmpui vawi 7-na, 'Palai thlah inkhawm' hi Pu Jerry Zoremsanga, Assistant Secretary in a kaihruai a, Pu Lalnunmawia, Secretary in report pein Lengkhawm zai intihsiak lawmman sem a nghal a ni. Sub-Headquarters YMA, Kolasib hnuai ah hian YMA branch 87 awmin member 35,381 an awm mek a ni. Lengkhawm zai intihsiakna lawmman pakhatna hi Hortoki Vengchhak Branch YMA in an la a, pahnihna hi Kolasib Hmar Veng niin pathumna hi Lungmuat Branch YMA te an ni.

Sub-Headquarters YMA, Kolasib inkhawmpui vawi 7-na ah hian Vairangte ațanga Sairang inkar kawng 4-lane kawngpui laih tur țan thuai a nih theih nana hmalak te, Sawrkar dawrna kawnga YMA hriatpuina ngai tam ta lutuk tih tlem te, Samagra Siksha hnuai a lehkhabu a thlawn a naupangte dawn țhin chu school luh rual a an dawn theih nana hmalak te, Phainuam leh Bagha inkar a Excise Check Gate dah tur a hmalak leh khawtlang tui tlan fintu luikawr dung a bawlhhlawh dalna siam tur a hmalak dan tur te rel a ni.