No.3446/2021-2022

Aizawl, the 17th December 2021 : Deputy Chief Minister Pu Tawnluia leh a thawpui Minister dang pahnih –Pu Lalchhandama Ralte leh Dr. K Beichhua te chuan vawiin Aizawl Bawrhsap Pisapui (DC Office) tukin khawvar hmaa vanduaithlak taka kang leh kangmei chhuak in Office hmunhma leh bungrua a tihchhiat dante enin a hmun an tlawh a. Aizawl DC Office lailawk tur atana ruahman chhin MLA Hostel hlui pawh an en nghal a. Heng hmun a tlawh hnuin Pu Tawnluia chuan a thawhpui Minister dangte chu Aizawl DC Office kan chungchangah a Office Chamber ah meeting a neihpui a, meeting ah hian Aizawl DC Office mipuiin an dawr leh vat theih nana Sawrkar ruahmanna siam te an sawiho a. Meeting ah hian Home Minister Pu Lalchamliana leh Minister – Pu K. Lalrinliana, Pu Lalchhandama Ralte, Dr. K Beichhua, Pu TJ Lalnuntluanga leh Pu Robert Romawia Royte te an tel a ni.

Deputy Chief Minister Pu Tawnluia chuan tukin khawvar hmaa Aizawl Bawrhsap Pisapui kang chu a vanduaithlak hle tiin helai hmun hi Mizoram hmunpui pawimawh tak, kan zavaia kan ngaihhlut a ni a ti a. Sawrkarin kangmei a chhuah chhan chui turin Magisterial Enquiry a din tur thu sawiin mipuiin Aizawl DC Office an dawr leh vat theih nan ruahmanna pawh a siam nghal a, mipuite lo chiai lo turin ka ngen duh che u a ni, a ti a. Aizawl Office atana ruahman lailawk MLA Hostel hlui chu tukin khan Legislative Assembly thuneitute leh PWD hotuten an en nghal thu sawiin a tul anga siam ngaite leh chei ngaite chu tih nghal a ni dawn a, a rang thei ang bera Aizawl DC Office chu a pangngaia mipuiin an dawr theih nan kal tir chu Sawrkar tum dan niin kan ngaipawimawh hle a ni, a ti a. Assembly in helai building hi phal taka hman an phal avangin Assembly Speaker Pu Lalrinliana Sailo leh Assembly hotute te hnenah lawmthu a sawi bawk a ni.

Pu Tawnluia leh Minister dangte hi Aizawl DC, Aizawl SP leh Fire & Emergency Services hotute a hmunah lo dawngsawngin kangmei chhuah dan nia hriat dan te hrilhin kangmei in bungrua leh record pawimawh te a tihchhiat dante an enho a. Hemi hnu hian Aizawl DC Office lailawk tur atan Sawrkarin a ruahman MLA Hostel hlui chu an tlawh nghal a ni.

Aizawl DC Office a document hlui te hi digitization kalpui mek a ni a, record leh lehkha hlui DC Archive Room a dah, zaa 95 bawr vel chu digitize hman a ni, mahse vanduaithlak takin tunhnaia record leh lehkha pawimawhte chu a kangral vek a ni.

Attachment

  • Loading attachment...