915/2023-2024

Aizawl, the 26th June 2023 : Vawiin khan International Day Against Drug Abuse and Illicit Trafficking ni pualin Aizawl Vanapa Hall-ah hun hman a ni a, Mizoram Deputy Chief Minister Pu Tawnluia chu khuallian niin Er. Lalrinawma, Minister Social Welfare & Tribal Affairs Department chu khual zahawm a ni. Kuminah hian “Mihring ngaihven hmasak: Thinhrikna leh thliarhranna tih tawp a, invenna tihchak” tih chu thupui atan hman a ni.

Pu Tawnluia chuan khawvel pum huap ruihhlo dona ni International Day Against Drug Abuse and Illicit Trafficking atan United Nations chuan June ni 26 hi a lo ruat tawh angin Mizoram pawhin hemi ni hi kum tin a hmang thin a ni, a ti a. He ni hi ruihhlo hman sual that loh zia te, ruihhlo tawlh ruk hlauhawmzia te, ruihhlo ngaih avanga mimal, chhungkua leh khawtlanga chhiatna thlen dan inzirtirna atan te hman thin a ni, a ti. Deputy Chief Minister chuan ruihhlo laka inven hmasak hi tihmakmawh a ni a, a la khawih ve ngai lo ten an khawih ve lohna turin chhungkaw tinah bul tan turin a chah a. Ruihhlo donaah chhungtin ten mawhphurhna kan nei a, kan agenda tihhlawhtlin turah dah theuh ila, chutianga kan tih theuh chuan nasa takin ruihhlo do kawngah kan hlawhtling thei ang, a ti. Kohhran,YMA leh NGO pawl hrang hrang te, department leh mimal, ruihhlo do kawnga theihtawp chhuah tute Pu Tawnluia chuan a fak a. Mizoram Chief Minister kaihhruaia din Ruihhlo Do Core Committee chungchang te sawiin ruihhlo do beihpui thlak nan Chief Minister Pu Zoramthanga'n cheng vaibelchhe 3 a sanction chu tangkai taka hman mek a ni, a ti.

Excise Miniser Er. Lalrinawma chuan ruihhloin Mizoram a run nasat avangin sawrkarin ralkhel dar a vua a ni ber mai, tiin tan lak a ngaih nasatzia a sawi a. State level ah Ruihhlo Do Core Committee dinin District tinah DC te kaihhruaina hnuaiah Committee te din a ni a, Sawrkarin theih tawp a chhuah tak meuh meuh a ni, Minister chuan a ti. Ruihhlo avanga Mizo thalai, a bikin Mizo mipa tam takin mual an liam pawi a tihzia a sawi a. Tunhma huna Mizo mipa te ropuizia leh khawtlang, chhungkaw tana an tangkaizia te, mahni nunna thapa ram leh khawtlang tana tang thin an nih zia te sawi chhuakin Er.Lalrinawma chuan mawhphurhna la ngam, Mizo mipa dik tak te penchhuak turin a sawm a. Ruihhlo leh thil tha lo tih nan an hun te hmang lo turin a fuih a. Vawiinah hian ruihhlo kan do hneh lo chuan naktuka kan hun tur a lungchhiat thlak hle ang, Excise Minister chuan a ti.

Ruihhlo dona ni pual inkhawmah hian Pu. Udit Prakash Rai, IAS, Commissioner & Secretary, Social Welfare & Tribal Affairs Department chu Chairman niin kalhawm te lawm thu a sawi a. Pu Lalduhawma Chawngthu, President, Mizoram Drug User Forum (MDUF) hen atangin thupui behchhana thusawi ngaihthlak a ni a. CYMA aiawihin Prof. Malsawmliana, Asst Secretary chuan thu sawiin “Ruihlo la ti ve lo te ven hi kan tihtur pawimawh hmasa ber a ni”, a ti.

Khawvel pum huap ruihhlo dona ni pual programme ah hian Mizoram chhunga ruihhlo dona kawngah ruihtheihthil ti te thinhrik mai lova thahnemngai taka an tana thawk thin te chawimawina hun hman a ni a, chawimawina dawngtu kohhran leh pawl hrang hrang 11 te hnenah Deputy Chief Minister Pu Tawnluia’n thilpek a hlan a ni. Ruihhlo dona kawnga pawimawh em em leh tangkai tak tur 'Handbook on Ruihhlo Do' chu khuallian hian a tlangzarh nghal bawk a. Pu. V Zaithanmawia, Dy. Secretary, Social Welfare & Tribal Affairs Department chuan lawmthu sawina hun hmangin programme hi a khar a ni.

Ruihhlo dona ni pual programme hi Department hrang hrang, Social Welfare & Tribal Affairs Department, NMBA Aizawl District, Health and Family Welfare Department, Mizoram Police, Excise & Narcotics Department, Higher & Technical Education, I.G Prisons, SCERT, I&PR, School Education, MRHG & CD, WCD, Assam Rifles, Project Pushpak, BSF, MSACS, CYMA, MDUF, FINGODAP, MSD&RB (SW&TA) te tawngho buatsaih a ni a. Department leh pawl hrang hrang aiawhte bakah school naupang te an tel a ni.