916/2023-2024

Kolasib dated 26th March 2023: Vawiin chawhma khan I&PR Conference Hall, Project Veng, Kolasibah Diakkawn, Khuangpuilam, Rengtekawn leh Vairengte III a Village Council inthlanna neih tur atan a Draft VC Roll tlangzarh a ni a. Pi Melody Ngurthantluangi, Additional DC chuan kalkhawmte lawmna thu sawiin Pu John LT Sanga, Deputy Commissioner chuan Roll hi a tlangzarh a, Pi Christina Lalmuanzuali, Election Officer chuan Draft Roll chungchang sawi zauna hun a hmang bawk a ni.

Deputy Commissioner Pu John LT Sanga chuan mipui rorelna leh duhthlanna tichiang tur a chanvo pawimawh tak, vote thlak chu kum 18 tling tawh te chuan khua leh tui tha an nih anga mawhphurna an hlen ngei ngei tur a nih thu a sawi a. Zalen tak a mahni duhthlanna hmang thei a kan awm hi hlut thiam a tul zia leh kan ram rorelna ah kan tel ve a ni tih tichiang turin Vote kan thlak ngei a tul thu a sawi bawk a ni. Mipui rorelna tichiang lehzual tur chuan kum 18 tling tawh phawt, Roll-a inziak lut a tam thei ang berin Vote an thlak a pawimawh a, Roll rintlak buatsaih kawngah Political party, khawtlang leh tlawmngai pawl hruaituten Roll tlangzarhte endik an ngaih pawimawh a tul thu Deputy Commissioner chuan a sawi bawk a ni.

Vawiin a Village Council 4-te Draft VC Roll tlangzarh hi ni 13, January 2023 MLA Electoral Roll behchhan a buatsaih niin Non-Tribal Elector-te chu ni 11 leh ni 17, July, 2023 chhung hian siamthat tur a tih a ni a. VC Roll siamthat hnu, Final VC Electoral Roll hi ni 18, July 2023 ah tlangzarh hman tur a ruahman a ni. Draft VC Roll tlangzarh taka tarlan danin Diakkawnah hian mipa voter 1285 leh hmeichhia 1506 awmin an vaiin voter 2791 an awm a, Khuangpuilamah mipa voter 552 leh hmeichhia 595 awmin voter zawng zawng 1147 an awm a ni. Rengtekawnah mipa voter 529 leh hmeichhe voter 523 an awm a, Vairengte III ah mipa voter 428 leh hmeichhe voter 445 an awm ang a chhinchhiah a ni bawk.

Vawiin Draft VC Roll tlangzarhna hun ah hian District Level standing Committee member-te, ERO, AERO, VLO leh Political party aiawhte an tel a ni.