1414/2023-2024

Aizawl, the 8th August, 2023: Vawiin chawhma dar 11 khan Deputy Chief Minister Pu Tawnluia, SEDP Executive Board Chairman ni bawk hovin SEDP Executive Board chu Family Oriented SEDP Phase 2 kalpui dan tur chungchanga pawimawh hrang hrangte relin Planning & Program Implementation Department Committee Room-ah an thukhawm.

Meeting kaihruaitu Deputy Chief Minister Pu Tawnluia chuan SEDP Executive Board thukhawm chu Sawrkar flagship program SEDP kenkawhna kawnga pawimawh ngaihtuahtu leh roreltu a nih thu sawiin, Sawrkar pawhin a ngai pawimawh hle a ni, a ti a. Board Member leh Line Department hrang hrangte chu flagship program tihhlawhtlin kawnga theihtawp chhuah turin a chah a. SEDP hnuaia hma la tha leh entawntlakte chu midangte tih phur nana hman theih tura pho chhuah tam a pawimawh thu a sawi bawk.

Eizawnna ngelnghet leh hmasawnna siam tura chhungkaw tinzawna duan, Sawkar flagship program pawimawh tak Family Oriented Socio-Economic Development Policy (FO SEDP) kaltlang hian chhungkaw eizawnna bultanna siam sak leh tanpuina pek hmangin Mizoram chhunga mimal leh chhungkua, a tam thei ang ber dimhmun tha zawka hlankai tum a ni a. Family Oriented tih a nih angin tanpuina hi chhungkua anga dawn tur a ni a, chhungkaw pakhat atangin beneficiary pakhat chauh awm theih a ni. Mizoram Sawrkar hnuaia heng Department: Agriculture, Horticulture, Animal Husbandry & Veterinary, Fisheries, Sericulture, Land Resources, Soil & Water Conservation, Commerce & Industries, Urban Development & Poverty Alleviation leh Tourism Department-te hnuaiah hian trade item (eizawnna kalpui tur) te thlan theih a ni.

A thawh khatna (Phase 1) hmangin chhungkaw 60,000 te hnenah tanpuina Rs 50,000/- sem chhuah tawh a ni a. A thawh hnihna (Phase 2) ah hian beneficiary 60,000 te thlan chhuah leh tur a ni a, MLA Constituency tin atanga chhungkua 1,400 thlan kaltlangin hamthatna dawngtu beneficiary 56,000 an awm thei dawn a; heng baka chhungkaw 4,000 dangte chu MLA Constituency lian deuah pek belh emaw, a mamawh zual chhungkuate SEDP Governing Board remtihnaa pek tur a ni a. He huna tarlan a nih danin tun dinhmunah beneficiary 59,736 (Agriculture 2163, A.H & Vety 37379, Commerce & Industries 10108, Fisheries 816, Horticulture 3055, LRS&WC 5612, Sericulture 50, Tourism 9, UD&PA 544) tihfel tawh niin, beneficiary dang 264 te chu tunkar chhunga tihfel hman tum a ni.

Family Oriented SEDP Phase-2 hi instalment hniha then a ni a. First instalment-ah hian beneficiary-te'n tanpuina Rs.25,000/- theuh an dawng hmasa phawt dawn a, second instalment-ah Rs 25,000/- an dawng leh dawn a, tanpuinate hi Line Department-te kaltlanga sem chhuah tur a ni. Phase-2 hnuaia first instalment hi a tul ang angte tihfel a nih hnuah September 2023 ral hma ngeia sem chhuah vek hman tum a ni.

He hunah hian FO SEDP Phase 2 kalpui tura beneficiary neih dan, sum pek chhuah dan tur leh hun bituk chhunga kalpui dan tur ruahmanna duante zirchian a nih bakah beneficiary-te hmalak dan enzuina leh hlawhtlinna changte hmalakna phochhuah sakna success story documentation tih dan tur tulte sawiho niin, hemi kawnga Department lam hmalak tawh chinte ngaihthlak a ni a. A titha zualte lawmpui leh chawimawi kawnga ruahmanna neih dante pawh sawiho a ni bawk.

SEDP Executive Board meeting-ah hian Mizoram State Planning Board Vice Chairman Pu H. Rammawi, SEDP Executive Board Member MLA te, Planning & Programme Implementation Department leh Finance Department hotute bakah SEDP kalpuitu Line Department hotute an tel a ni.