1415/2023-2024

Champhai dated 8th August 2023: Vawiin khan Govt. Champhai College Multipurpose Hall-ah, Sports & Youth Services Department leh Mizo Zirlai Pawl (MZP) te tangkawp buatsaih 'Youth 20 Mizoram - Meet on Nationalism, Patriotism & Development' tih thupui hmang a zirlai intawhkhawmna neih a ni a. Minister Pu TJ Lalnuntluanga chu khuallian niin Pu P. Lalhmingliana, Principal, Govt. Champhai College chuan hun a kaihruai a ni.

Ministry of Youth Affairs & Sports, Govt. of India chuan India ramin G-20 Presidency a chelh chhunga India ram hmun hrang hranga Youth-20 Programmes a hman mek chu Mizoramah pawh hman chhoh ve mek a ni a. G-20 Secretariat lamin phalna an rawn pek angin heng programme te hi thalaite leh zirlaite hnena Mizoram tan, ram leh hnam tana hmasawnna thil pawimawh tak tak in zirtirna hun atan Sports and Youth Services Department leh MZP tangkawpte hian buatsaihin hma an la a ni.

Minister Pu TJ Lalnuntluanga chuan thupui pawimawh tak hmanga Mizo thalaite tan Youth 20 Meet buatsaih a ni chu lawmawm tiin, he hmalakna hian ram leh hnam humhalh leh hnam inpumkhatna pawimawh zia kan thalaite thinlungah a tuh ngei a beisei thu a sawi a. Hnam changkang leh ropui apiangin an hnam an dah pawimawhin an ngaihsan thin thu sawiin zirlai kalkhawmte chu mahni zawn theuhah hnam chawimawitu nih tum thin tur leh hnam dang nupui pasal nei lo turin a ngen a. State dang leh ram danga cheng Zohnahthlak unaute ngai pawimawha, an thlavang hauh kawngah pawh kan tanrual chhunzawm zel a tul a ni, a ti bawk.

A sawi zelnaah Pu TJ Lalnuntluanga chuan kan ram leh hnam hmasawn zelna turin kan thawhchhuah leh tarchhuah te kan tih pun a, kawng hrang hranga intodelh tura tan kan lak a tul takzet a ni tiin, zirlaite chu thawh hreh nei lovin chhelna, dawhtheihna leh tumruhna nen theihtawp chhuaha an hma lam pan turin a chah a. Program buatsaihtu Sports and Youth Services Department leh MZP te chungah lawmthu sawiin ram leh hnam humhalhna kawnga sulsutu leh hma la thin tu MZP hruaitute thawhrimna chu fakawm a tih thu a sawi a ni.

Vawiin program-ah hian Champhai khawpui chhunga Higher Secondary School leh College zirlai thahnem tak an tel a. Pu Michael Lalramsanga, Vice Chairman Y20 Committee, MZP chuan Keynote Address sawiin, Tv L.Ramdinliana Renthlei Adviser MZP Gen Hqrs chuan thu a sawi a. Cultural program hlimawm tak neih a ni bawk.

'Youth 20 Mizoram - Meet on Nationalism, Patriotism & Development' hi Aizawl, Kolasib, Saitual leh Khawzawl ah te pawh hlawhtling taka neih tawh niin Mizoram District zawng zawngah neih chhunzawm a ni dawn a ni.