Vawiin khan Deputy Chief Minister Pu Tawnluia'n Mizoram Cancer Care Foundation (MCCF) Raising Day Vawi 9-na Lawmna Mizoram State Archives Hall, Babutlang, Dawrpui ah a hmanpui a, Khuallian a ni bawk a ni.

Khuallian leh MCCF Member ni bawk Pu Tawnluia chuan thu sawiin MCCF Raising Day a sawm a nih chu lawmawm, a ti a. Vawiin hun pawimawh taka Khuallian a nih chu Pathian khawngaihna leh zahngaihna a ni, tiin a sawi.  Cancer vanga natna leh hrehawm tam tak tuarte leh cancer vanga thihna tawk chhungkua Zoram dung leh vanga mite a tawrhpui thu a sawi bawk a. Deputy Chief Minister chuan cancer in mihring nunna a suat mek avangin nunphung hrisel, eitur thianghlim leh zuk leh hmuam tih loh te inzirtirna leh inhrilh hriatna uar leh zuala kalpui a ngai a ni, tiin a sawi. Hriselna leh ram hmasawnna a inzawm avangin hriselna ngai pawimawh hmasa tura inzirtirna, a bikin sikul naupangte ah uar leh zual ni se, tiin a sawi a. Mizoram Health Care Scheme hnuaiah pawh cancer vei te chu ngai pawimawh bikah dah a ni a, Cancer veite enkawlna tur institute tha zawk pawh sawrkar hmalaknain ruahmanna siam mek a ni, tiin a sawi. Tun dinhmuna cancer veite enkawlna tur khawl tha pawh Chief Minister hriatpuina in lei a ni dawn a ni, tiin a sawi bawk a ni.

He hun hi MCCF President Pu C.Zaihmingthanga'n a kaihruai a. Kalkhawmte lawmna MCCF Vice President Pu Nupuii Renthlei in a nei a, Rev. Lalzuithanga'n Hunserh a hmang a, MCCF Treasurer Pi B.Vanmawii'n Kaltate Sunna Hun a kaihruai a, MCCF Adviser Upa Zamliana chuan cancer vanga thi te leh  natna khirh tak nei te leh damlo mek te tan tawngtaina hun a hmang a. MCCF General Secretary Pi Lalmalsawmi chuan MCCF chanchin report tawi a pe a. MCCF Raising Day Lawmna hi Sr. Vice President Pu H.Lalbiaktluanga'n lawmthu sawiin a khar a ni.

MCCF ah hian Office Bearer  8, Adviser 6, Committee Member 22, Evangelical Sub-committee din a ni a, MCCF ah hian member 1040 an awm a. Sum hmuhna hi membership fee Rs 200 leh donation an hmuh atangin a ni ber a. Inrinni vawi 3 naah Faith Ministry inkhawmna hmunah (K.Sapsanga Building)  inkhawm hona an nei thin a. Zemabawk Cancer Hospital ah pawh inkhawmna leh sharing kartin  an nei ho thin bawk a ni. Damlo te pualin tawngtaina leh eitur theih ang ang, a remchang apiang kengin damlo te tlawhin hun an hmang thin a ni.