Corona Virus (Covid-19) hrileng avangin, ei leh bar leh nitin mamawh harsatna tawh hlauhthawn thilah mipui thenkhat te an chi-ai tih Mizoram Sawrkar Food, Civil Supplies & Consumer Affairs Department chuan a hria a.

Tun dinhmunah Food, Civil Supplies & Consumer Affairs Department Godown hrang hrangah buhfai1,68,569.73 Qtls a awm mek a. FCI Godown-ah 1,59,028.20 Qtls a awm bawk a, hei hi Mizoram in buhfai a mamawh thla thum (3) daih vel a ni. Mipuiin harsatna an tawh loh nan tunkar chhung ngeia Retailer ten buhfai an sem theih nan department in ruahmanna a siam mek bawk. Aizawl-ah Petrol 2,54,051 Ltrs leh Diesel 2,55,876 Ltrs a awm a, kalkawnga lo kal mek thahnem tak a awm bawk a, hetih rual hian Sorkar thuneitute leh IOC hotute in be pawp rengin IOC lamin POL leh LPG ah Mizoram-ah harsatna a thlen loh tur thu Mizoram Sorkara hriattir bawk a ni.  LPG Supply dinhmun pawh a tha a, kalkawng a lo kal mek engemaw zat a awm bawk a ni. Nitin mamawh State dang atanga lakluh kawngah harsatna a awm lova, engkim tluang takin a kal mek a ni.

Hetiang hi thil awmdan a nih avangin ei leh bar leh nitin mamawh chungchangah tumah chi-ai lo turin FCS&CA Department chuan mipuite a ngen a, Sorkar leh Department hmalakna te thlawp tlat tur pawhin Department chuanmipuite a sawm a ni.

Mizoram Sorkar, FCS&CA Department chuan nitin mamawh thil zuar leh dawrkaite pawh an thil zawrh chheprelh lo tur leh thil man chhiar san belh loh turin a hriattir a. He hriattirna zawm lote chu The Prevention of Black Marketing and Maintenance of Supplies of Essential Comodities Act 1980 leh The Consumer Protection Act 2019 hmanga hrem anni ang tih mipuite leh dawrkaite a hriattir a ni.