Information & Public Relations Department huaihawta SEDP hnuaia Press Project Site Visit buatsaihah Lawngtlai District MJA-te chuan nimin khan India leh Myanmar insumdawn tawnna tur Kaladan Multi-Modal Transit Transport Project (KMMTTP) kawngpui laih mek leh Lawngtlai District chhunga Hruitezawl khaw bul Chhimtuipui luia 'lung mak' an tlawh.

He press project site visit-a kal turte hi Lawngtlaia prominent journalist, Lairam chanchinbu Editor Pu V. Lallianzuala chuan Lawngtlai Press Club atangin a vai liam a. He project visit-ah hian Lawngtlai DIPRO Pu C. Lalhruaitluanga, MIS kaihhruaiin Lawngtlai District MJA te hi an President Pu Lalngheta Ralte hovin an kal a ni.

Kaladan Multi Modal Transit Transport Project (KMMTTP) kawngpui laih mek an ennaah hian PWD Multi Modal Project Division hnuaia kawng package hrang hrang enkawltu Junior Engineer-te leh kawng laih hna thawktu contractor-te'n he team hi lo dawngsawngin, an hriat duh angte an lo hrilhfiah a. Lung mak an ennaah hian Hruitezawl khawtlang hruaitute leh tlawmngai pawl hruaitute'n an khuaah lo dawngsawngin, a hmunah an zui ve bawk.

Kaladan Multi Modal Transit Transport Project (KMMTTP) hnuaia Mizoram chhunga kawngpui kal tur hi a tira km 99.83-a thui tura ruahman kha, kawng tawi zawk zawn that a awm nual avangin km 88-ah tihtawi a ni tawh a. Black top tur hi km 87 niin, hmun riatah lei dawh tur a ni a. A hna hi package 3-ah then niin, package-I (km 0-35) hi RDS Company-in an contract a. Package-II (km 35-60) hi Atlanta-ARSS Company te’n an thawk thung a. Package-III (km 60-88) hi RDS bawkin an thawk a ni.

Kawng hi km 87.000 luan (blacktop) turah km 81.500 luan zawh tawh a ni a. Lei (bridge) pariat (8) dawh turah paruk (6) thawh mek niin, pahnih (a hmasa ber leh a tawp ber) hi IIT Guwahati te'n a design an endik mek a, an pawmpui veleh hna hi tan ve leh nghal tur a ni. A pumpui khai khawmin hna zawng zawng 94.20% thawh zawh tawh ang a ni a. Lei la dawh theih loh pahnih tih loh chu kuminah zawh fel vek a nih tur thu, he kawng enkawltu PWD MMPD Executive Engineer Er C. Lalhumhima chuan a sawi.

He kawngpui sial meka kawngpui formation zau zawng hi metre 12 niin, blacktop chin hi metre 7 a ni a. An hmanraw phah zawng zawng (subgrade 500mm, GSB 300mm, WMM 250mm, DBM 70mm & BC 40mm) hi muk tha taka chil vek niin, lei lawng atanga blacktop chung ber thlengin kawngpui chhah zawng hi fit 2'2" a ni. Lei dawh tur hi sub-structure leh superstructure inkawp a ni a. Superstructure hi thir hlang niin, bearing manufacture hi Kolkata-ah thawh mek a ni a, steel girder superstructure erawh Noida, Delhi-ah thawh mek a ni. Tunah hian lei 8 zinga 5 superstructure material chu a dawhna tur hmun site-ah phurh thlen a ni vek tawh a ni.

A kawng enkawltute'n harsatna hrang hrang an sawi zingah, bridge design endik (proof checking) chhung duh aiin a rei an tih thu leh ram buai (land acquisition) avanga hna khaihlak chhung chu ni 430 vel a nih thu an sawi a. A hun taka hna zawh fel a nih theih nan ram chungchanga buaina awm chu thuneitute'n ching fel thuai se an duh thu, kawng enkawltute chuan an sawi.

MJA te hian Lawngtlai District chhunga Hruitezawl khaw bul Chhimtuipui luia 'lung mak/lung mawi', Mara lam sawi dana 'Castle of Beino' tia hriat lar ni bawk chu tlawhin, khualzin hip tura theh lar leh hman a nih thei dan tur te an en nghal bawk a. Chhimtuipui lui dunga lungpui lian leh mawi tak tak awm khawm chu hmuhnawm leh mit titlai tak a nih piah lamah, a lui dung boruak hrim hrim pawh chu hah tidam leh mi chhawk zangkhai thei tak a ni a. He lung awm khawm hian a bul hnai khuaa mite sawi danin thawnthu a neih nual bakah, a lui dunga hi lawnga leu vel nan leh a suar thenkhat lai chu rafting tih nan te pawh hman theih tur a ni a. Sawrkarin felfai taka ruahmanna siama a bawhzui chuan tourist destination tha leh lar tak ni thei turah an ngai a ni.

Lung mak hi Lai Autonomous District Council (Lawngtlai District) leh Mara Autonomous District (Siaha District) ramri lui, Chhimtuipuia awm niin, Siaha lam atang leh Lawngtlai lam atangin a kal theih ve ve a. Lawngtlai lam atanga kal tur chuan KMMTTP kawngpui zawh zelin, km 60 velah Ngengpuitlang pengah a peng a. Hemi atang hian tlan zelin, Ngengpuitlang - Tuidangtlang - Hruitezawl a ni a. Hruitezawl atang hian lawngin lui hnar lamah chhoh tur a ni.