Vawiin khan Saitual Public Playground ah Saitual District pum huapin a vawikhat nan Chapchar Kut ropui taka hman a ni a, Human Resources Development Board Vice Chairman Pu L. Thangmawia, Lengteng bialtu MLA chu "Kut Pa" niin Tawi bialtu MLA, Art & Culture Minister ni bawk Pu R. Lalzirliana chu "Kut Thlengtu" a ni a, he kut chhim tur hian Saitual District chhunga khaw hrang hrang an kal kim hle a ni.

"Kut Pa" Pu L. Thangmawia chuan kut chhimtu mipui kalkhawm te  Chapchar Kut chibai bukin, Saitual District thar a din hnu a district pum huap a Chapchar Kut lawmna hun siam a ni chu lawmawm a tih thu a sawi a. Saitual mipuiten district headquarters an nihna anga inhawng tak leh zo taka Chapchar Kut an thleng chu fakawm a tih thu sawiin, khawpui rilru pu chung zelin district thar thanchhoh zelna leh district inrelbawl tharna ah rilru zau leh puitling tak pu a, District pumpui rualkhai taka a than theihnan theihtawp chhuahpui turin a sawm a. District thangchak ber leh hmasawn chak ber ni turin tan la zel tura sawmin Saitual District chu zohnahthlak hnam hrang hrang, tawng hrang hrang hmangtute awmkhawmna a nih avangin zofate inzawmkhawm lehna atana sulsutu tur district pawimawh tak an ni thei a ni a ti a, Chapchar Kut hman lai mek chu hemi kawnga bultanna chhinchhiahtlak ni se a duh thu a sawi a ni.

"Kut Thlengtu" Pu R. Lalzirliana pawhin thusawiin Chapchar Kut chu kan hnam ziarang leh kan hnam lam te, zai te, nun zemawi pholanna hun tha tak a ni a ti a, kan hnam nun zemawi tlawmngaihna, aia upate thuawihna, rinawmna, huaisenna, thenawm khawveng, ram leh hnam min hmangaih thar tirtu atan hmang theuh turin kalkhawmte a chah a, pi leh pu ten mipa naupang leh hmeichhe naupangte an kaihhruai thin dan kha a zahawmin a zirtlak hle a ni a ti a, hmeithai leh mirethei zawkte laka an rilru put dan ngaihsanawm takte kha a mawiin nun ho ti nuamtu a ni a ti a, thangtharte pawhin kan pi leh pute thurochhiah leh inkaihhruainate chhawm nun zel hi kan mawhphurhna a nih bakah kan hnam dinchhuahna tur atana ki pawimawh tak a ni a ti.

Vawiin Chapchar Kut hi Saitual District bawrhsap Pu C. Lalpeksanga'n inlawmna thu sawiin bul a tan a, MUP Saitual District ten Kut hawnna Hlado an chhamin silai kan kap a, Saitual District chhunga khaw hrang hrangte an tel kim hle a, zohnahthlak hnam hrang hrang ten an hnam lam leh zai te an entir a. Khawlian Branch MUP ten Sa Lu Lam leh Zangta Lam (Paite) an entir a, Khawlian Branch YMA in Khawlian Tlanglam an entir a, Phuaibuang Branch YMA in Farel Lam leh Hmar Arsi Lam, Saitual Bazar Branch YMA leh Keifang Venglai Branch YMA in Khuallam, Changzawl Branch YMA in Sarlamkai, Buhban leh NE Khawdungsei atangin Siktuthiang Lam, Ngopa Branch YMA in Thlur hnih zai leh Cheraw, Saichal Branch YMA in Cheraw, Mimbung Branch YMA in Buh tuh Lam an entir a, Bualpui Cheraw tichhuaktu Hliappui khua (NE Bualpui) in Bualpui Cheraw an entir bakah intihhlimna hun te, malzai mawi tak tak te ngaihthlak a ni a, tlaiah chhawng hnawtin kut ruai an theh bawk a ni.