Sports & Youth Services, Tourism leh ICT Minister Pu Robert Romawia Royte chuan Saitual, Khawzawl leh Champhai District chhunga a enkawl department hmunhmate chu Official-te nen tlawhin an enfiah. 

Minister hian nimin khan Saitual Keifang Venga Football Field siam mek leh Phullem phah hnathawh a en a, Keifanga Basketball Court siamna tur hmun  tlawh bawkin,  Saituala Phullem phah mektu Contractor  chu uluk taka thawk tur leh kumin April thla chhunga  zo fel hman ngei turin a hrilh a ni. Pu Robert Romawia Royte hian Dulte Football Field leh Kawlkulh Football Field-te pawh a enfiah nghala, Minister hi Bialtu MLA Pu L.Thangmawia, Vice Chairman, Human Resources Development Board chuan a tawiawm a ni. 

 Hemi hnu hian Khawzawl tlawh lehin, Khawzawl Mualvawm Field-a Phullem phah hnathawh a tlawh a.  Khawzawl Bawrhsap Pu H.Lianzela,  Contractor, Site Engineer te nen enfiahin, Minister chuan Contractor-te chu Lung hman thalo leh  Pipe pan lutuk chu thlak vek turin a hriattir a ni. Minister chuan Khawzawl Kawnzar hmuna Sports Complex din chungchanga Tuichang Bialtu Dy CM Pu Tawnluia rawtna chu umzuiin EAP Scheme hnuaiah Working DPR siam mek anih thu a sawi bawk. Khawzawl Dinthar Venga Volleyball Court Artificial turf phah tumte a enfiah bawk a. Tourism Minister ni bawk Pu Robert Romawia Royte chuan Khawzawl Lungvar Venga Tourist Lodge sak mek a tlawh bawk a ni. 

Pu Robert Romawi a Royte chuan tukin khan Chhangphhut Field, Champhai leh District Sports Complex New Champhaite tlawhin   a tihchangtlun dan turte a enfiah a, mamawh an thlente a tul anga mithiamte rawna bawhzui a nih tur thu a sawi a ni.     Champhai District Sports discipline hrang hrang hotute nen Circuit House-ah inkawm bawkin, an mamawh thlente leh hlawhtlinna te a ngaihthlak sak a. Sports Minister chuan, “Champhai district chu infiamna a theihna sang tak nei anih avangin   Sports Hmunpui (Sports Hub) ah siam kan tum anga, SAI Centra dinna tur rawtna pawh umzui a ni ang” a ti bawk. Tourism Minister hian Tourost Lodeg Champhai sak mek an enfiah bawk a ni. Minister hi Dr ZR Thiamsanga, Champhai North MLA leh Vice Chairman, Health & Family Welfare Board chuan a tawiawm a ni. 

Pu Robert Romawia Royte  hi Pu Lalsangliana, Director, SYS; Pu Saitluanga, Join Director, Tourism; Pu Lalrammawia, Chairman, ZOHANCO leh Official dang te’n an tawiawm a ni.