Hnahlan Zone Football Championship 2020 chu vawiin chawhnu khan Sports & Youth Services Minister Pu Robert Romawia Royte chuan khuallian ni a hmanpuiin a hawng. He hun hi bialtu MLA leh Vice Chairman, Health & Family Welfare Board Dr. ZR Thiamsanga chuan a telpui a ni. 

 Khuallian Pu Robert Romawia Royte  chuan Football chu khelmual chhunga khelh mai anih loh thu sawiin, football khelh chu chin dan  thalo hrang hrangte do a, hengte laka fihlim theihna tur atana    rawngbawlna pakhat a ni, a ti a. Infiamna chu tunlaiah eizawnna a tling tawh a, Mizoram sawrkarin Group B chin hnuailam  Sawrkar hna za a 5  chu  infiammite tan a hauhsak a ni, a ti a. State Games tha taka bialin a tawiawm vangin lawmthu a sawi a, kuminah Constituency games neih tum ani tiin,  nakumah State games neih leh tur niin, Constituency games leh State games te chu a  tahtawl zela kalpui tum anih thu a sawi a, Coach leh Scout te tirhzel an nih tur thu a sawi bawk. 

Minister chuan khawtlang mipui hmaah thusawiin, Mipuite rawngbawl tura tih an nih angin Sawrkar fawng cheltute’n theihtawp an chhuah mek zel thu a sawi a. Mipuite chu sawrkar kalphungte zirchianga hnathawh dante thlithlai ve reng tur leh dik leh tha taka hna thawh anih theihna turin an thlawpna a ngen a. Sawrkar hmalakna hrang hrangte tarlangin, Sikul hun tih danglam, Zu zawrh khap, Road tax tihdanglam, inkalpawhna kawng siam that, eirukna dotu tur Lokayukta din tawh anih thute leh Zofate inpumkhatna leh lungrualna thlen theihna turin,  Heritage Tourism hnuaiah Zofate inpumkhatna ‘Zo Kutpui’ huaihawt a ni a,    Jampui tlang dung, Tripura leh Churachanpur, Manipur-ah te hlawhtling taka buatsaih tawh ani a, hmun dangah pawh remchan dan thlir chung zela neih tum ni, a ti bawk.  

ICT Minister  ni bawk chuan Mizorama inbiakpawhna tha zawk a awm theihna turin   Company-te sawrkarin a vil reng thu leh a nawr reng thu a sawi a.  Mipuite kan lo hrisel zawkna turin Fit Mizoram Movement, March 22, 2019 ah kalpui tan ani a, Education Policy tharah  sikul naupangte Fitness ngaipawimawh ani dawn a ni, a ti bawk.  Hnahlan chu Grape thar leh sawngbawl kawnga hriat hlawh leh entawntlak anih thu pawh tarlangin,  Grape chingtute chu tan la thar tura fuihin, Sawrkarin theihtawp a chhuahpui dawn thu a sawi bawk. 

Hnahlan chu football tuina leh thiam tamna  khua anih thu tarlangin, Hnahlana Sports infrastructure te tichangtlung turin sawrkarin hma lak a tum a, Football Field chu Technical Survey-te neiha   zirchian phawt hnuah  tihchangtlung dan ngaihtuah anih tur thu a sawi a. Football khel thiam kalkhawmte chu Football infiamna chu  taksa hriselna leh ram hmel timawitu atana hmang a, football tourism siam thei tura ngaihtuahna seng turin a chah a.  Hnahlan Zone Football Championship 2020 neih tur hlawkthlak taka hman anih theihna tura  duhsakna hlanin a hawng a ni.

Bialtu MLA leh Vice Chairman, Health & Family Welfare Board Dr. ZR Thiamsanga pawhin thusawiin, Hnahlan khua chu infiamna huanga khaw hmingtha tak anih thu leh Mizoram State Games neih zawh takah pawh Gold Medal la thei mi 2 an neih thu a sawi a. Sport Minister in Hnahlan khua a rawn tlawh chu lawmawm a tih thu sawiin, ni chhinchhiah tlak tak Sports lama bung thar kaina  anih ngei a beisei  tlat thu a sawi a. Hnahlan khuain Football Academy tha a lut thei infiammi an neih thu pawh sawilangin, Championship khel tura kalkhawmte chu infiammi thinlung  thianghlim pu a inelna hmachhawn theuh turin a chah a ni.   

Hnahlan Zone Football Tournamnet 2020 hawnna hun  Pu Hrangthanpuia Fanai, Senior Vice President, Hnahlan Zone Football Association kaihhruaiah hian Pu C.Hualrikhuma, President CDFA Champhai chuan Hnahlan Zone chu football thiam tamna, District ang zawng pawha   enhmaih ngailoh hmun anih thu a sawi a. Sports Minister leh bialtu MLA infiamna chawinun tlat tumtute thahnemngaihna a fak bawk  a ni.

Hnahlan Zone Football Championship 2020 ah hian Hnahlan leh a chhehvel khua atangin Football Team 8  an tel a ni.  Minister hian Zote, Ngur, Vapar, Hnahlan khua Sports Association te hnenah sports bungrua a sem a. Ngur NGO tan Computer Set 1, Govt. Ngur High School leh Govt. Hnahlan High School-tan Computer Set 7  te pek an nih tur thu a sawi a ni.

Pu Robert Romawia Royte  hi Pu Lalsangliana, Director, SYS; Pu Saitluanga, Join Director, Tourism; Pu Lalrammawia, Chairman, ZOHANCO leh Pu Benjamin Zalawma Ralte, DSYO, Dr Lallawmkima, DIPRO leh Official dang  te’n an tawiawm a ni.