No.7049/2020-2021  

Vawiin khan Deputy Chief Minister Pu Tawnluia chuan  New Market Building, Aizawl a hawng a, khuallian a ni. Commerce & Industries Department Minister Dr. R.Lalthangliana leh Sports & Youth Department Minister leh Bialtu MLA nibawk Pu Robert Romawia Royte chu khualzahawm an ni. 

Khuallian Pu Tawnluia chuan khawtlang hruaitute leh District Council hotute thahnemngaihna a zarah helai sumdawnna (market) hmun hi din a ni a, hun a lokal zela building tha zawk mamawh a ni tih sawrkarin a hria a, Kum 2016 khan building hlui zawk chu a him tawklo tih Disaster & Rehabilitation Department a mithiamten an sawi chu sawrkarin ngai pawimawhin vanduai mangkhawng a ni thei tih a hria a, building thar mi 1000 chuang inpho theihna hi sak tan a ni, a ti a. Khuallian chuan mizo firm ngei- Lushai Engineers ten New Market Building tha tak maia an sa zo thei chu a chhuan thu leh a lawm thu a sawi a. Hmalam pan zelna-ah mizo thlai thar, sa leh dil sangha te pawh a tam zawk zuar theih ni se a duh thu leh hemi kawnga tan la zel tur pawhin mipuite a chah a. A tharchhuaktu, a zuartu leh a leitute tan malsawmna New Market Building chu ni zel se, chhungkaw tam takin eizawnnana an hmanna hmunpui ni zel bawk se a duhsak tak zet thu a sawi a. Hemi bakah hian a hmun vawn fail eh thianghlim kawngah mitinin mawh an phur a, inthiarna floor tinah a awm bakah mipa leh hmeichhia inthiarna a awm hrang thei chu United Nations- Sustainable Development Goals Agenda 2030 hnuaia target pakhat Gender Equality tih hlawntlin nana sawrkar hmalakna a ni, tiin a sawi. Deputy Chief Minister Pu Tawnluia chuan changkan kan zirna kawngah hian thianghlimna ngai pawimawh zel ila, hemi kawngah hian a khawtual Local Council members leh NGOs te pawn tan lakpui turin a ngen a ni.

Khualzahawm Dr. R.Lalthangliana pawhin thu sawiin COVID-19 hrileng karah sawrkar kaihruaina zawma New Market Building hawn a ni thei chu lawmawm a ti a, a buatsaihtu Commerce & Industries Department chungah lawm thu a sawi bawk a. Hriselna tha kan nei theihna tana thil pawimawh em em-  thlai thar, sa zawrhna hmun tha leh thianghlim neih hi a ni a ti a. New Market Building awmna Dawrpui chu veng pawimawh leh mi hmasate lo awmna veng a nihna ang a Aizawl hmel ti mawitu ni zel turin Khualzahawm Dr. R.Lalthangliana chuan duhsakna leh lawmpuina a hlan a ni.

Khualzahawm leh Bialtu MLA ni bawk Pu Robert Romawia Royte chuan New Market Building leh a chhehvel chu hmun pawimawh leh hlu tak a nih avangin New Market Building bakah Aizawl Smart City Project atangin Aizawl City Centre sak mek a ni, a ti a. Aizawl City Centre chu market ringawt nilo a, infiamna atan pawn hman tangkai a nih dawn thu leh bazaar hmunpuia kalte tana parking awlsam zawk leh tam zawk siam a nih tur thu a sawi a. Minister chuan Aizawl khawpuiin a mamawh, Mizorama la awm lo- Trauma/Emergency Hospital din a nih theihnan hmalak mek a nih thu a sawi bawk a ni. 

New Market Building hi Rs. 13 crore a sak a ni a, Lushai Engineers sak  a ni a. Febuary 2016 khan bul tannin Febuary 2019 ah sak zawh a ni. Life 2, Staircase 2, leh Floor 7 a awm a. Floor tinah hian mipa leh hmeichhe inthiarna a hrangin a awm a. Basement V, IV, III, II, I te hi 200.30 sqm, 529.12 sqm, 529.12 sqm, 629.52 sqm, 629.52 sqm a zau a ni. Groundfloor hi 679.52 sqm a zau niin chawhmeh zuar 92 an awm thei a, first floor hi 356.33 sqm a zau a ni.