No.7267/2020-2021

Vawiin khan Deputy Chief Minister  Pu Tawnluia’n Chaltlang-a  Public Multipurpose Utility Centre, Chaltlang sakna tur lungphum a phum a. He mi puala inkhawmna hi Chaltlang YMA Hall-ah neih a ni.

Deputy Chief Minister Pu Tawnluia chuan thu sawiin Public Multipurpose Utility Centre sak hna tan theih a lo ni ta chu lawmawm a tih thu tarlangin he project atana thahnem ngai taka hma latu pawl hruaitute, grassroot level-a roreltu Local Council member te leh UD&PA –a thawktute zawng zawng inpekna a ni a ti a. Vantlang in kawng hrang hranga an chhawr tangkai tlan theih tur leh hmasawnna rotling leh Aizawl khawpui ti changtlung tu tur Public Multipurpose Centre chu veng chhung mipuite chauh ni lovin veng dang te pawhin an rawn chhawr tangkai theih ngei a beisei thu sawiin a building satu tur contractor te chu an hna uluk tur leh an hnathawh te pawh ngun taka lo vilpui turin Chaltlang khawtlang hruaitu te chu a ngen a. 

Deputy Chief Minister Pu Tawnluia chuan UD&PA Department in Chaltlang huamchhunga hmasawnna atana hmalakna dangte- Smart City hnuaia Chaltlang Multipurpose Hall, cheng vaibelchhe 15 a sak tur te, Tourist Lodge cheng vaibelchhe 17.5 a sak tura ruahman a ni thu te a sawi bakah UD&PA leh AMC atanga hmachhawp an neihte- Tlangtelel (Chaltlang tlak lam Edenthar chung) atanga Chanmari Road leh DIET Complex mual kawng alignment zawn a, a tul anga tih changtlun (upgrade) a nih tur thu a sawi bawk a ni. COVID-19 vangin Mizoram chauh ni lo, khawvel pumah hmasawnna hna in a tuar a, Mizoram sawrkarin duh anga hmasawnna hna dang te a thawk chak thei lo chu pawi a tiin mipui pawhin an hriatthiam a beisei tih a sawi a ni.

Chaltlang-a Public Utility Centre hi State fund atanga thawh tura ruahman a ni a, State sawrkar atangin October ni 5, 2018 khan Administrative Approval 481.00 lakh leh Expenditure Sanction 250.00 lakh hmuh a ni a, August ni 30, 2019 ah Expenditure sanction 231.00 lakh hmuh leh a ni. Sawrkar lam atanga sanction-te hmuh fel a nih hnu hian document tul ang angte buatsaih niin, a building design-tu tur zawnna atan EOI January ni 7, 2020 khan tarchhuah a ni a, firm 3 in EOI hi rawn thehlutin Zofa Consultancy Service, Dawrpui Vengthar chu Consultancy firm atan thlan an ni a, anni hian building design leh tul ang angte an tih fel hnuah Tender hi ni 25.09.2020 khan tar chhuah leh a ni a, a hnathawk tu atan hian Biakliana & Sons te chu thlan an ni a, Work order pawh pek tawh an ni bawk.

Floor hrang hrang hman dan tur chu hetiang hian ruahman a ni.

i. Ground Floor & First Floor: Vegetable/Meat Market

ii. Second Floor: Auditorium - 120 seaters

iii. Basement 1 & 2 Floor: Parking floor for LMV & 2 wheelers

iv. Basement 3 Floor: Vegetable/Meat Market

He inkhawmna Pu H.Lianzela, Director UD&PA in a kaihruaia, Rev. V.Lalkima, Chaltlang Bialtu Pastor, PCI, Mizoram Synod chuan hunserh a hmang a. Pu C.Malsawma, EE chuan technical report a pe a, Pu H.V.L Zarzoenga’n lawmthu sawiin hun a khar a ni.