No.7266/2020-2021
Lawngtlai District mi leh sa, state pawn lama hna thawka ei zawng, COVID-19 hri leng vanga lo hawte pualin vawiin khan Mizoram Youth Commission (MYC), Commerce & Industries Department leh Planning & Programme Implementation Department hnuaia Entrepreneurship Development Centre Mizoram te tang kawp buatsaihin ni hnih awh tur "Entrepreneurship Development Programme for Returned Migrant Workers, Lawngtlai District" chu Government Lawngtlai College Hall-ah neih tan a ni a. Lawngtlai Bawrhsap Dr Andrew H. Vanlaldika chuan he hun hi hmanpuiin, training hi a hawng a ni.
Dr Andrew H. Vanlaldika chuan COVID-19 hri leng vanga khawvel buai karah mahni leh chhungkua inchawm nana state pawn lama hna thawk chhuak thalai chhuanawm tak takte loh theih lohva mahni in leh lova an lo haw a ngai chu vanduaithlak a tih thu sawiin, chuti anga hna thawk lo hawte chu sawrkarin theih tawp chhuaha a ngaihsak zui erawh lawmawm a tih thu a sawi a. Mihringin kan nih tur tak kan nih theih nan leh hmasawn zel nan training chu intuai hriamna hmanraw pawimawh ber a nih thu sawiin, mahni hriat tawh sa dah tha a, resource person-te thu sawi chu ngun taka ngaithla a, thil thar zir chhuah tum ngei turin trainee-te chu a chah a. Eng hna pawh taima leh rinawm taka thawk mi chuan malsawmna an dawngin, an hlawhtling ngei ngei thin a ni tiin, training tura kal khawmte chu District tana chhenfakawm leh mi dang tana eizawnna hial pawh siamsak theitu nih tum turin a fuih a ni.
Training hawnna hun hi Lawngtlai District Industries Centre (DIC)-a Functional Manager Pu C. Dokulha'n kaihruaiin, training nihphung tlangpui a sawi fiah a. Khuallian District Bawrhsap Dr Andrew H. Vanlaldika leh DIPRO Pu C. Lalhruaitluanga te'n training tura kal khawmte hnenah t-shirt leh training material an sem a. Resource person-te'n zirtirna an pek chhunzawm nghal a ni.
He training-ah hian resource person pathum - Pu R. Lalthankima, Asst Professor, Govt Lawngtlai College & Master Trainer; Pu Lalrammawia Khawlhring, Asst Professor, Govt Lawngtlai College & Trainer; leh, Pu William Sailo, Asst Accounts Officer, Samagra Shiksha & Trainer te awmin, anni hian trainee-te chu ei zawnna kawng an zawh zelna tura tul leh pawimawh hrang hrangte a lem nena entirin an kawhhmuh a. Zawhna leh chhanna leh sawi hona hun hman chhunzawm thin a ni bawk.
Planning & Programme Implementation Department chhinchhiah danin Lawngtlai District-ah state pawna hna thawka ei zawng, COVID-19 hri leng vanga lo haw migrant worker mi 106 an awm a. He'ng zingah hian boruak ziaawm hnua mahni hna thawhna hmuna let leh tawh leh hna dang thawk leh tawh an awm bawk a. EDC training hi mi 50 tan buatsaih a ni.
Attachment
- Loading attachment...
