No.7265/2020-2021

Vawiin chawhnu khan SAD Conference Hall-ah Health & Family Welfare Minister Dr. R. Lalthangliana hovin Mizorama COVID-19 dinhmun thlirhona neih a ni.

Vawiin thlirhona ah hian naktuk January ni 22, 2021 atanga zirnain hrang hrang hawn tan a nih dawn tak avanga zawm tur Standard Operation Procedure (SOP) School Education department-in an siamm chu enho a ni a, zirlai hostel-a lut turte tan RAgT hmanga sample test vek a ngaih avangin an RAgT hmanga sample test-na tura ruahman sa Bawngkawn leh Chawlhhmun ami chu mamawhna a san avangin tihpun a nih thu tarlan a ni a, Bawngkawnah sample test-na booth pathum dah belh a nih thu leh Chawlhhmunah booth pakhat dah belh a nih thu tarlan a ni a. Aizawl chhim lamah RAgT kiosk dahna tur an hmuh zawh rih loh thu leh zawn mek zel a nih thu tarlan a ni bawk. R.Dengthuama Hall pawh January ni 31, 2021 atangin RAgT hmanga sample test chhunzawm theih turin ruahman mek a nih thu tarlan a ni bawk.

Vawiin thukhawm chuan zirnain hawn a nih hunah Health department in endik hna thawk se an ti a, zirtirtute zawng zawng pawh RAgT hmanga sample test tha an ti bawk.

COVID-19 vaccine Covishield 16,500 dawn belh leh thu tarlan niin a vaiin 35,000 dawn a nih tawh thu tarlan a ni a, hei hian health care workers zawng zawng a daih vek tawh thu tarlan a ni bawk. Vawiin atangin Champhai, Kolasib, Siaha leh Serchhip district-ah COVID-19 vaccine pek tan a ni a, vawiin chawhnu dar 1:00 thleng khan Mizoram pumah health care workers 2010 in vaccine dose khatna hi an dawng tawh a ni.

Mipuite hnenah SOP mhman lai mek chungchang leh thil pawimawh dang in hrilhfiah tula hriat a nih vangin Medical Operational Team ruahmanna in TV leh Radio kaltlangin zirtirna pek tha tih a ni a, hun remchang hmasa berah talk show buatsaih nise an ti bawk.

Health Minister Dr. R. Lalthangliana chuan kan dinhmun a him  tawh viau nia kan inhriat avang hian kan inthlahdah palh ang tih a hlauhawm a, tunhnaiah tualchhunga hri kai thar an awm leh tak nual avangin tumah inthlahdah lo ila, theihtawpchhuahin i fimkhur zel ang u, a ti a. 

Vawiin review meeting-ah hian Medical Operational Team Chairman Dr. ZR Thiamsanga, MLA a tel a, Health & Family Welfare, Disaster Management & Rehabilitation, School Education department leh hotute an tel a, Police hotute leh Aizawl district bawrhsap a tel bawk.

Attachment

  • Loading attachment...