No.7264/2020-2021

Lawngtlai East bialtu MLA, Agriculture Development Board Vice Chairman ni bawk Pu H. Biakzaua chuan vawiin khan Lawngtlai khawpui chhunga hmasawnna hna thawh tur project pali chu a hmunah tlawhin, hna kalpui dan tura ruahmanna siam ngai te a enfiah.

MLA hi Lawngtlai Bawrhsap Dr Andrew H. Vanlaldika leh LADC-a Executive Member-te bakah, official leh political party hruaitute'n an tawiawm a. Lawngtlai Chandmary rama Lawngtlai District Sports Complex sakna tur te, Lawngtlai College Venga Lawngtlai Residential Sports School sakna tur te, Government Lawngtlai College-a Students' Hostel sakna tur leh Lawngtlai Tourist Lodge bula Community Service Centre sakna tur hmun te tlawhin, hna thawh dan tur leh hna tan hmaa ruahmanna siam ngai te an en ho a ni.

MLA Pu H. Biakzaua chuan infiamna lamah te, zirna lamah leh vantlang tana hmun pawimawh din kawngah te state sawrkar atanga Lawngtlai District tihchangtlunna leh tihhmasawnna tur project lian tak tak hmachhawp a awm chu lawmawm a tih thu a sawi a. Vawiina project pali a tlawh chu a sum pawh 1st instalment pek chhuah remtih tawh a nih hlawm avangin, rei lo teah hna tan theih thuai a nih a beisei thu a sawi.

Lawngtlai District Sports Complex hmun atan hian Lawngtlai Chandmary Branch YLA chuan phal takin an ram an thawh a. Hemi atan hian Rs nuai 5,009 ruahman niin, sum pawh 1st instalment pek chhuah remtih a ni tawh a. A mual hi track & field tur niin, a dung metre 150 leh a vang metre 100 vela zau a ni dawn a. Gallery leh dormitory te pawh awm tura ruahman a ni.

Lawngtlai Residential Sports School hmun tur hi Lawngtlai College Veng Branch YLA ram ni ve thungin, ram hi sawrkarah an hlan tawh a. Hemi atan hian Rs nuai 3,400 ruahman niin, 1st instalment pek chhuah remtih a ni tawh a. Khelmual phullem phah, academic building, quarters, zirlai 100 lenna hostel, multipurpose hall, meeting hall, tuizem, badminton, basketball leh volleyball court leh table tennis board, transformer, gym leh infiamna hmanraw hrang hrang awm tura ruahman a ni.