2301/2022-2023
Aizawl, the 13th October 2022 : Deputy Chief Minister Pu Tawnluia'n vawiin khan Sialhawk khuaa zirna luh kum 100 tlin lawmna, Sialhawk Literary Centenary program Community Hall-a buatsaih chu khuallian niin a hmanpui a. Programme tan hmain Centenary hriat rengna lungphun a hawng bawk a ni.
Deputy Chief Minister Pu Tawnluia chuan Pathian hruaina changin Sialhawkah kum 100 chuang zirna kalpui a ni chu khawtlang leh mipuite a lawmpui thu sawiin a lawmna an buatsaih hian zirna an ngaihpawimawhzia leh an ngaihsanzia a tilang a ni, a ti a. Sialhawka Pu K Rumliana'n Primary sikul zirna bul a tan te, Pu VL Siama'n Middle sikul zirna bul a tan te leh Pu F. Sapbawia'n High sikul bul a tanna te kha thil chhinchhiahtlak leh ropui tak niin heng zirna in atangin Zoram pum huap angin ram tana mi tangkai leh an hnaa mi hlawhtling tam tak a chherchhuak tawh a ni, a ti.
Deputy Chief Minister chuan zirna chungchang sawiin zirna tel lovin hmasawnna leh changkanna tak tak a awm thei lova, finna leh hriatna bul a ni a, hlawhtlinna leh chanvo tha min petu a ni, a ti. He hun hmanga zirlai kalkawmte chu dam chhungin zir tur kan ni tih chu hre reng chunga a zir thei apiangte tha taka zir a, hlawhtlinna an chan ngei theih nan zirlai te zir uluk turin a chah a ni.
Sialhawk khua in zirna lamah hming tha an chher bakah tunhnaia Mizoram pum Inter Village Football Tournament ah 2-na an nihna te leh Mizoram pum huap anga lakhuihthei ching tam ber khua an nihna te chu thil ropui nia a ngaih thu a sawi lang a. Lakhuihthei tharchhuah lama an hlawhtlinna te chu thil chhuanawm tak a ni tiin a hralhna tur kawng tha zawk Sawrkarin a ngaihtuah mek a, hemi kawngah theihtawp a chhuahpui zel dawn tiin a sawi bawk. Hemi atan Sawrkar Flagship Programme SEDP pawh tangkai zawka hman tum a ni tiin lakhuihthei lama hmalakna chu SEDP peng pakhatah a ngaih theih thu a sawi lang a ni.
Sialhawka zirna bul tan a nih dante leh hma a sawn zel dan chanchin chu Pu Lawmsanga, Headmaster, Government Sialhawk High School in a sawi a. Centenary thupui thlan 'Hmasawnna bulpui - Zirna' tih sawizauna chu Pu CVL Thanhlua, Asst. Prof. Govt. T Romana College hnen atangin ngaihthlak a ni a. Centenary puala Souvenir buatsaih chu Deputy Chief Minister tawiawmtu Khawzawl DC Pu CC Lalchhuangkima'n a tlangzarh a ni.
Zirna meichherin kum za a tlin lawmnaah Sialhawk khua atanga zirna kawnga mi hlawhtling Group A hna chelh mek leh chawl tawh te chawimawi an ni.
Sialhawk hi kum 1895 khan Sailo lal Vuttaia nupui Neihpuithangi hova a pasal boral hnua din a ni a. 1920 khan Lower Primary LP School din niin Welsh Mission hnuaia zirtirtu atan lak Pu K Rumliana chu zirna bultantu a ni a. 1945 ah Middle School din leh a ni a, chu sikul chu Mizorama Middle School hmasa ber pawlte zing a mi a ni a. Khaw dang tam tak atangin he Middle School ah zirna chhunzawm turin buhfai te kengin mi inah awmin zirlai naupang te chu sikul kal turin Sialhawkah an awm thin a, Chief Minister Pu Zoramthanga pawh hi he Middle School atanga zirchhuak a ni. High School pawh kum 1963 khan din a ni a, mahse harsatna hrang hrang avangin kum tam tak a kal thei lova a hnua din thar leh a ni. Tunah hian Sialhawk ah zirna in 7 a awm mek a ni.
Mi thenkhatte ziah dan chuan Mizorama zirna tan tak chu Bualpui ah 1890 niin Bengali tawngin zirna hi tan a ni a. Kum 1894 a Welsh Missionary Zosap Pu Buanga ten Zarkawt Tlanga an din Sikul chu Mizo tawng hmanga zirna in hmasa ber a ni.
Covid hripui len avangin a hun takah Centenary hi 2020 ah khan lawm a ni thei ta lova, kuminah lawm a ni ta a ni. Indopui pakhatnaah khan Sialhawk khaw tlangval 18 te chu France ah kum 1917 ah Labour Corps in a kal a ni.
Attachment
- Loading attachment...
