2300/2022-2023

Champhai, the 13rd October, 2022: Sericulture Department changtu Minister Dr. K.Beichhua chuan tukin dar 7:30 khan District Sericulture Office, Champhai a tlawh. Minister hi Commerce & Industrial Development Board Vice Chairman Pu K.Laldawngliana, MLA chuan a tawiawm a. Thawktute nen inkawmhona hun hmangin an hmalakna leh hmachhawpte a sawipui a, three phase current lakluh anih theih nan hma lakpui nghalin silk pangang vulhtute cocoon tharchhuahte a enpui bawk.

Dr. K.Beichhua chuan District Sericulture Officer leh a thawhpuite hmalaknate chhuanawm a tih thu sawiin, Office vawnfai leh enkawl kawngah theihtawp chhuah chhunzawm zel turin a chah a. Sericulture Department-in project tha tak tak a kalpui thu sawiin, sawrkar laipui pawh a tul ang zela dawra hmalak thin a ni, a ti a. Department hmalaknate leh hmachhawpte mipuite hrilhhriat kawngah leh pangang khawi chu eizawnna tlak leh hmabak eng tak nei a nih dante uar zawka puanzar kawngah tan la zual turin department thawktute a chah bawk.

DSO Champhai Pi Hmingthantluangi chuan cocoon-te chu thar chhuah tam vang ngawta a man tlahniam ve lo, hralh dan rate pangngai reng a nih thu sawiin, pangang khawi chhungkua Champhai District-ah 87 leh Khawzawl District-ah 55 an awm mek thu a sawi a. Sawrkar flagship programme Family Oriented SEDP hnuaiah Sericulture Department Champhai District-ah beneficiaries 19 leh Khawzawl District-ah beneficiary 63 an awm thu tarlangin, beneficiary-te account-a SEDP 1st Installment thun turin an inpeih fel tawh thu DSO chuan a sawi bawk.

District Sericulture Officer (DSO) Champhai hian Champhai District leh Khawzawl District Sericulture-te enkawl kawpin, kumin 2022 chhunga Champhai leh Khawzawl District-a silk pangang khawitute thingtheihmu pangang cocoon thar chhuah zat chu metric ton 3.8 a tling tawh a. Pangngai khawitute cocoon thar chhuahte hi a that leh that loh dan (quality) a zirin kg ah Rs.150 atanga Rs.350 thlenga hralh  thin a ni. Thingtheihmu maimaw pangang bakah hian Muga (Nauthak) maimaw pangang leh Eri (Mutih) maimaw pangangte chu farmer-te hian vulhin cocoon engemawzat an thar bawk a ni.

Ministry of Textile, Government of India hnuaia Silk Samagra 2  'Sustainable Livelihood through Ericulture in East Mizoram, 2022-2023 & 2023-2024 Project' tih chu Champhai leh Khawzawl District-a beneficiary 300 te tana kalpui turin Sericulture Department chu a inbuatsaih mek bawk a ni.

District Sericulture Officer Champhai hnuaiah hian tun dinhmunah thawktu Champhaiah 21 leh Khawzawlah 3 te an awm mek a.  Sericulture Farm 2;  Mulberry Seed Farm, Dinthar Veng Champhai leh Oak Tasar Seed Farm Tlangsam te awmin, Oak Tasar Farm bik hi Mizorama a awm chhun a ni.