Deputy Chief Minister Pu Tawnluia chuan UD & PA chu department pawimawh tak, khawsak chawikan kawnga kawng hrang hranga hma la thintu, Scheme hrang hrang enkawltu leh viltu pawimawh tak annih thu a tar langa, notified town 23 huam chhungah hmasawnna hna ngawrh taka kalpui a nih thu a sawi bawk. Pu Tawnluia chuan,” UD & PA chu department naupang tak ni chung siin an hmalakna leh an hnathawh a zau hle a ni,” a ti a,” Aizawl khawpui traffic tawt tih ziaawm nana kan Chief Minister kaihhruaina a duan Parking House Support Scheme pawh UD&PA kaltlanga hma lak mek a ni a, Parking House sak tanpuina dawng thei engemaw zat hnenah puihna pek chhuah a ni tawh a, dawng thei thlan chhuahna kalpui chhunzawm leh mek a ni,” a ti bawk. Deputy Chief Minister chuan Town & Country Planning hnuaiah Master Plan te District Headquarter zawng zawng tan siam anih thu leh Town 13 ah Master Plan siam tawh anih thu a sawi a, heng Master Plan te hi a hlui deuh tawh avanga revise leh mek anih thu tar langin Champhai, Kolasib leh Khawzawl Master Plan siam nan chak taka hma lak mek anih thu a sawi bawk. Deputy CM chuan faina kawnga hmalakna thenkhatte tar langin Cesspool Cleaner Vehicle (Ekpaih Motor) te pawh tangkai taka mipuiten an chhawr thin thu a sawia, Aizawl Municipal Area pawn lam Aizawl District Cencus Town-ah “The Mizoram Town Sanitation Rules, 1980” hmangin Factory, Workshop, Restaurant, Hotel, Tea Stall, Hawker, Hoarding Licence siam a endik thin a nih thu a sawi bawk. Pu Tawnluia chuan Tuirial kama bawlhhlawh paihna (Tuirial Dumping Ground) hman mek chu Solid Waste Management Center thara in sawn tur a ruahman mek a nih thu sawiin,” He Center hian a zawh dawn loh avangin Sihphir, Luangmual leh hmun dangah Solid Waste Management Center dang siam tura inbuatsaih mek a ni,” a ti bawk. Dy CM chuan ,”Sorkar Flagship Programme SEDP hnuaiah kan Khawpui te tih changkanna turin UD&PA hian hma kan la chho dawna, he kan hmalakna tur ti hlawhtling tur hian kan rama NGO leh Mipui te thawhpui ah ka sawm che u a ni,” a ti a, mipui leh ram tana chhenfakawm leh inpekna thar nena hnathawk turin UD&PA a thawktute chu fuih in,” He Directorate Building kan hawn tak hi mipui leh kan ram tana malsawmna a lo nih theih nan ka duhsakna sang ber ka hlan a ni,” a ti bawk.
Pu Lalruatkima, Rural Development Department Minister chuan UD & PA department chu mikhual lo kalte hnena kan ram hmelhmang tilangtu pawimawh tak a nih thu sawiin,” Hmalakna reng reng hi khawpui atanga in tan ani tlangpui a, chuvang chuan khawpui pawn thleng phak hmasawnna awm tura hma latu pawimawh tak chu UD&PA department hi a ni,” a ti a,” Building thar kan neih hian kan rilru pawh siam tharin mite tana malsawnna thlentu nih ngei i tum theuh ang u,” a ti bawk.
Vawiin UD & PA Directorate building thar hawnnaah hian Dr C. Vanlalramsanga, Secretary in kal khawmte lawmna thu a sawia, Pu Joseph H Lalramsanga, Director in technical report te pein Building floor hrang hrangte enkual a hun hman a ni bawk.
Directorate Building, UD & PA department sakna tur hi a bul tan nan Special Plan Assistance (SPA) hnuaiah kum 2013-2014 chhung khan sum dah a ni a, Tender chhuah niin contractor atan Lushai Engineers, Ramhlun Venglai thlan a ni. Kum 2015 october thlaah hna thawh tan a ni. Kum 2017-2018 chhung khan NEDP hnuaiah sak zawhna tur sum hmuh belh leh a ni a June ni 15, 2019 khan building hi sak zawh a ni. Building hi floor 9 a sang niin Basement -1 hi Parking, Basement -2 hi Caretaker’s Quarter, Basement -3 Canteen, Basement -4 hi lower entrance a hman a ni a, Ground floor ah Establishment leh NULM (State) ten an luah a, 1st Floor ah Director, Swachh Bharat Mission leh Plan branch te awmin, 2nd Floor ah NULM leh Account branch, 3rd Floor ah Technical branch leh 4th Floor ah Town and Country Planning wing te an awm a ni.
Attachment
- Loading attachment...
