Vawiin chawhnu khan Human Resources Development Board meeting chu School Education Minister Office Chamber-ah an thukhawm a, Pu Lalchhandama Ralte School Education Minister-in meeting hi a kaihruai an ni.

School Education Minister Pu Lalchhandama Ralte chuan Human Resources Development Board chu zirna lamah thuneitu sang anih avangin member te chu zirna kawnga ram in hma a sawnna turah tih tur an ngah thu te, sorkar sikul chauh ni lovin private school te pawh zirna hmasawn zel nan an en zui tur thu te leh ngaihtuahna uluk taka hman a tul thute a sawi a.

Pu L.Thangmawia Vice Chairman chuan thingtlang zirna tihhmasawn nan article 275 hnuaiah te, BADP hnuaiah te leh project siamna atangtein zirtirtute quarters engemawzat sak theih a beiseiawm thu te, sorkar hmalaknaah documentation a pawimawh thu te sawiin Board member te chu Mizoram tan thahnemngai taka thawk turin a sawm bawk.

Meeting-ah hian Mizo tawng humhalh nan Mizo language Committee hnathawh dan an thlir a, an term of reference te ennawn nise, midangte nen inrawnkhawmna te pawh neih nise tih an rel a. Sorkar school a enrolment tlahniam zel chungchang te an sawiho a ni.

Meeting-ah hian kum 2008-2019 chhungin sikul 110 chu enrolment hniam avangin sikul 54 ah chhun khawm a ni tih te, kum 2012-2019 chhungin sikul 19 chu khar a ni a, kum 2016-19 chhungin sikul 6 chu comprehensive sikul atan sawikhawm a ni tih tarlan a ni.

Meeting-ah hian Vice chairman Pu L Thangmawia MLA te, Secretary School Education Department te, Director Higher & Technical Education  te, Director School Education te MBSE chairman te, Director SCERT te, zirna lama Department hotute leh memberte an kal tha hle a ni.