Vawiin khan I&PR Conference Hall Mamit-ah Nehru Yuva Kendra (NYK) Mamit bultumin Theme Based Awareness & Education Programme hman a ni a. Pu Jacob Lalawmpuia, MCS, Addl. DC, Mamit chuan khuallian niin a hmanpui.

Khuallian chuan NYK hnathawhte tha a tih thu sawiin thalaite chu ram leh hnam tana kut leh ke ni tura an tha tichak turin a sawm a. Tunlai khawvel chu thalaite khawvel a ni tawh a, thalaite a dik zawnga tihchak chu Sawrkar pawhin a tum ber a nih thu sawiin ram tan, khawtlang leh Kohhran tana an pawimawh avangin Young India Movement a lo chhuak a. Youth Force hmangin India chu tihhmasawn tum mek a nih thu a sawi. Kan thluak te, kan chakna te, kan rilrute a tha lama tangkai taka khawtlang tana hmang turin thalai kalkhawmte chu a fuih bawk a ni.

Pi C. Lalnuntluangi, United Nations Volunteer- District Youth Co-ordinator (UNV-DYC), NYK Mamit chuan NYK hnathawh thin tlangpui tarlangin Theme Based Awareness & Education Programme chu zirna piahlamah thalaite puitu tur thil tangkai tak anih thu sawiin kalkhawmte chu NYK Programme dang dangah pawh telpui thin turin a sawm a ni.

He hunah hian Pu K. Lalmakthanga, Programme Officer, NSS Mamit chuan Corruption Free India : Mizoram tih thupui hmangin kalkhawmte zirtirna a pe a. Pi Lalramnghaki Hauhnar, District Lead Swasth Bharat Prerak chuan Health & Nutrition tih thupui hmangin zirtirna a pe a. Pu Zodinsanga Colney, Manager, UD&PA pawhin National Flagship Scheme hrang hrang sawifiahna a neih bakah Pu Vanlalchhuanga Chhangte, Secy, Sub. Hqrs YMA Mamit pawhin khawtlang inrelbawl dan hrang hrang a sawi bawk.

He hun hi Pu Malsawmzuala Hauhnar, Programme Officer, NSS Mamit-in kaihruaiin Govt. Mamit Higher Secondary School naupangte an tel a ni.