1570/2023-2024

Khawzawl, 18th August 2023: Sikkim Independence Day Football Tournament For Chogyal Sir Tashi Namgyal Memorial Cup 2023 a Mizoram aiawha kal Khawzawl Vengthar FC-te chuan vawiin khan Champion nomawi nen Khawzawl an rawn thleng a. Deputy Chief Minister, Tuichang AC bialtu ni bawk Pu Tawnluia hovin champion team hi Khawzawl mipui ten an lo hmuak a ni.

Khawzawl Vengthar Pu Lianzuala kawta Champion team lawmna hunah thu sawiin Deputy Chief Minister chuan Bialtu MLA anih angin Khawzawl Vengthar FC leh Khawzawl mipuite chu a lawmpui thu a sawi a. Champion nomawi chu thawhrimna, tanhona leh tumruhna rah chhuah a ni, a ti. Khawzawl Vengthar FC hlawhtlinna chuan tanrualna leh thawhhona hi chakna hnar a ni tih min zirtir se, Khawzawl District mipuite rilru chawikangtu, rilru huaisenna leh mahni an inrinngamna hnar ni ngei bawk se a duh thu a sawi a ni.

Deputy CM chuan Mizoram sawrkarin thalaite hmakhua ngaiin infiamna leh zirna lamah thahnemngai takin hma a la a ni, a ti a. Khawzawl Vengtharah khuarel chhiatna vangin football field duhthusam din theih ni ta lo mah se, Futsal Ground din tuma hma lak mek a ni tih a tarlang a, UD&PA Engineer ten a hmunah an enfiah tawh tih a sawi. Pu Tawnluia chuan Khawzawl Vengthar FC te chu an kal zelna turah duhsakna a hlan a, Sikkim-a ‘Governor’s Gold Cup’ an khelh leh turah pawh theihtawp chhuah pui a tum thu a sawi bawk.

He hun hi Pu Lalnunenga, Khawzawl District FA Secretary chuan a kaihruai a. Khawzawl DC Pu K. Lalrohlua leh Joint VC Chairman Pu Vanlalsiama te pawhin thu an sawi a, Pu KC Ngurbiakzuala chuan report tawi a pe a. Khawzawl khaw chhunga pawl hrang hrang ten Khawzawl Vengthar FC te hi duhsakna thil pek an hlan a ni.

Sikkim Independence Day Football Tournament For Chogyal Sir Tashi Namgyal Memorial Cup 2023 ah hian Sikkim chhunga team tha pali bakah Karnataka, West Bengal leh Mizoram atangin team pali an tel a. Khawzawl Vengthar FC te hi an champion avangin October ni 30 atanga November ni 10 chhunga khelh tur Sikkim-a khelh tur ‘All India Governors Gold Cup’ khel turin an tlin nghal bawk.