1569/2023-2024

Champhai the 18th August, 2023 – Vawiin chawhnu khan Health & Family Welfare Minister, Dr R. Lalthangliana chuan Mizorama General Nursing & Midwifery (GNM) Zirna In pathumna General Nursing & Midwifery (GNM) School, Champhai Vengsangah a hawng. India Covid-19 Emergency Response and Health Systems Preparedness Package Phase II (ECRP-II) kaltlanga Rs. 13,46,40,800/- (Cheng vaibelchhe sawm pathum, nuai sawmli paruk, sing li leh zariat) senga ruahman tur Critical Care Block, District Hospital, Champhai lungphum a phum bawk a ni.

Hawnna inkhawm Pi Esther Lal Ruatkimi, IRS, Principal Secretary H&FW kaihhruaiah Dr R. Lalthangliana chuan thu sawiin, General Nursing & Midwifery (GNM) School, Champhai leh Critical Care Block ruhman tur te chu Health kaihhnawih hmasawnna ruhrel pawimawh tak an nih thu sawiin thalaite zirna leh eizawnna kawngah, leh mipui hriselna kawngah hmasawnna nasa tak a thlen ngei a beisei thu a sawi a. Mizo Nurse te hna an thawk tha in India ramchhung leh foreign hmun hrang hrangah te an inzarpharh a, an chhuanawm takzet a ni tiin, nursing line tih hmasawn zel pawh Sawrkarin a ngai pawimawh a, Council of Ministers Meeting dated 31/07/2023 chuan Directorate of Nursing din a rem tih thu sawiin, hei hian Nursing lamah hmasawnna tam tak a thlen ngei dawn a ni, a ti a.

H&FW Minister chuan thingtlang khuaa health infrastructure leh primary health care tih hmasawn chu a ngaih pawimawh hmasak thu sawiin Mizorama Sub Centre awm zawng zawng 375-te chu Health & Wellness Centre ah upgrade vek tawh niin, Primary Health Centre building te sak that an ni bawk a. Sub Centre awm lohna khaw 235 ah Health Clinic din bawk niin, SEDP Health Worker mi 235 lak an ni bawk a. District Hospital tinah Oxygen Plant bun vek niin District Hospital hrang hrang thuam that leh sak that hna thawh mek anih thu a sawi a. World Bank kaltlangin Strengthening of Health System in Mizoram Project hnuaiah cheng vaibelchhe 280 sengin Mizoram health infrastructure tih changtlun hmalakna kum 2021 atanga bultan niin kalpui mek a ni a. Healthcare Bill tang mek te pawh clear thuai tum niin,Asian Development Bank (ADB) kaltlangin cheng vaibelchhe 1000 ruahmanna siam anih thu H&FW Minister chuan a sawi bawk a ni.

H&FW thawktute thawhrimna leh inpekna chu chhuanawm a tih thu sawiin mi harsa leh natna khirh tak tak vei te thahnemngai tak leh hmangaih taka an lo enkawl thin avangin an chungah lawmthu a sawi a. An hnathawh ropui tak avangin mi tam takin damna an chang thin a ni tiin an hahna leh an inpekna chu a thlawn lo a ni tih hre thar leh fo thin turin a chah bawk a ni.

Champhai South bialtu MLA & Minister EF&CC etc Pu TJ Lalnuntluanga chuan Champhai in hmasawnna thar duhawm tak tak nei chho zelin, tun tumah GNM School din thar a ni ta chu Champhai District mipuite tan bung thar leh mellung pawimawh tak a ni, a ti a. Mi khua, mi State, mi ram kan awt thin a, mahse, keini pawh hian Pathian zarah hma kan sawn ve zel a ni tiin, khua leh khua te hi kan inawt tawn thin a, theihtawp chhuah tlang ila, beiseina eng neiin, hma kan sawn zel dawn a ni tiin kalkhawmte a fuih a. Mizoramin Industry lian kan la nei lova, Mizo ten kan thawh thiam leh kan that em em na, Nursing hi State Economy innghahna pawimawh tak a ni, a ti a. Sum leh pai inpek ringawt hi puitlin na a ni lova, thiamna inpek hi a hlu a, he GNM Nursing School pawh hian mi thiam tam tak an lo chher chhuah ngei ka beisei a ni tiin, thawktute leh zirlai lut tur te duhsakna a hlan a ni.

Champhai North MLA & Vice Chairman H&FW Board Dr ZR Thiamsanga pawhin thu sawiin hun rei tak Champhai mipuiten anlo nghahhlel leh anlo thlir thin a taka a chang ta chu thil ropui tak a ni tiin, Chief Minister Pu Zoramthanga, H&FW Minister Dr. R. Lalthangliana leh he GNM School din tura an hun leh tha leh ngaihtuahna seng zawng zawng tute chungah lawmthu a sawi a. Nurse hna chu hna zahawm leh kan khawtlang leh economy atan pawh pawimawh tak anih thu sawiin GNM School Champhai chuan hmasawnna nasa tak a thlen ngei dawn a ni, a ti a. Covid-19 hrileng avanga harsatna nasa tak kan tawh hnuah Mizoram chuan harsatna khirh tak tak engemawzat - lirnghing, vawk hri leng, fall army worm, ramri buaina, Myanmar leh Manipur buaina avanga raltlante buaipui chhoh a ngai a. Heng harsatna hrang hrang karah hian Sawrkar chuan theihtawp chhuah zelin H&FW kaihhnawih hmasawnna ruhrel te pawh ruahman belh mek zel niin, hmalakna chak taka kalpui zel anih tur thu a sawi a ni.

Pi Lalchhanhimi, JD (Nursing) chuan Academic Report a pe a. General Nursing & Midwifery (GNM) School, Champhai hi Lunglei leh Kolasib hnuah Mizorama GNM zirna School pathumna a ni a. Inspection pawh paltlang tawh niin, kumin Academic Session tharah hian class bultan nghal tum a ni a. Batch khatah seat 20 awm tur niin, kum 3 chhung zir tur a ni a. Class XII Arts, Science leh Commerce zir chhuak, 40% mark hmu chin ten an apply thei a. Indian Nursing Council in a bituk angin August ni 1 atanga September ni 30 chhungin admission process kalpui a ni dawn a ni. Pi F. Lalnunsiami chu Principal turin sawrkar in a ruat fel tawh a, he school a zirtirtu (tutor) tur 20 te lakna kalpui mek niin MSSSB in written exam conduct tawh in result nghah mek a ni.

Mizorama Critical Care Block hmasa berte ni turin Champhai District Hospital leh ZMC ah te Critical Care Block ruahman mek niin vawiin khan H&FW Minister Dr R. Lalthangliana hian a lungphum a phum a. Damlo na zual - Emergency, Surgical & Intensive Care te enkawlna tur Critical Care Block hi khum 50 awm tur niin India Covid-19 Emergency Response and Health Systems Preparedness Package Phase II (ECRP-II) kaltlanga ruahman a ni a. Implementing Agency hi NHM Mizoram niin Civil Works Executing Agency hi Mizoram PWD a ni a. A project hnuaia Building component hi Rs. 13,46,40,800/- (Cheng vaibelchhe sawm pathum, nuai sawmli paruk, sing li leh zariat) a ni a, PWD ah transfer fel tawh niin, contractor pawh thlan fel tawh a ni a, hnathawh bul tan chhoh mek a ni. He Critical Care Block hian Intensive Care Unit (ICU), High Dependency Unit (HDU), Isolation Room, Isolation Bed, Dialysis, Maternal & Child Health (MCH), Operation Theater (OT), Labour, Delivery & Recovery (LDR), Laboratory (Point of Care Lab) te a keng tel dawn a ni.

Dr PC Lalramliana, Principal Director, H&FW Dept pawhin thu sawiin, Dr Lalmalsawmi Sailo, Director, Hospital & Medical Education chuan lawmthu sawina hun a hmang a ni.

Vawiin General Nursing & Midwifery (GNM) School, Champhai hawnna inkhawm ah hian H&FW Department leh Department dang thawktute, Champhai MJA leh MZP, tlawmngai pawl hrang hrang leh khawtlang hruaitu mi thahnem tak an tel a ni.