1927/2023-2024

Khawzawl, 18th September 2023: Vawiin khan Deputy Chief Minister, Tuichang AC bialtu ni bawk Pu Tawnluia hovin Khawzawl District-a Head of Office te chu DC Conference Hall-ah an thu khawm.

He hun kaihruaitu Deputy Chief Minister Pu Tawnluia chuan Head of Office kalkhawmte lawmna thu sawiin; District thar enkawl chu awm lo a ta thil awm tir a nih angin chona tam tak a awm a ni, a ti a. Sawrkarin harsatna lian tak - hripui leng vangin a tawk a, a pawisa hmuh tur cheng vaibelchhe 3000 bawr vel a hmuh loh thu pawh sawiin Pu Tawnluia chuan hripui leng bakah hian - vawk pul hri, ram kang, lirnghing, raltlan leh ramri buai vangin harsatna hrang hrang a tawk a; hmuh lawk lohna lamah pawisa tam tak hman a ngai ta a ni, a ti a. Heng harsatna karah hian sawrkar chuan chhungkaw tin khaichhuah hi thupui berah neiin, flagship program - SEDP chu a theih ang angin nikkum lam atangin a kal pui tan tih a tarlang a. Vawiina kalkhawm ten tawrhchhelna leh thahnemngaihna nena Khawzawl District-an enkawl avangin bial mipuite aiawhin lawm thu a hrilh a, duhthawhna vanga tawngkam na leh an ngaihdan piah lam a lo sawi a nih chuan an ngaihdamna leh hriatthiamna a dil nghal bawk.

Deputy Chief Minister chuan Khawzawl Town chhunga Head of Office kalkhawmte chu Model Code of Conduct-in a phuar hma hun tlemte chhunga hmalakna tam thei ang ber neih a nih theih nan an office kalphungte inhrilhtawna, hma thar lakna tur inbengvarna hun atan he meeting hi hmang turin a sawm a. Sawrkar chuan a hmuna thawktute ngaihdan leh thurawn a ngaipawimawh hle a ni, a ti.

He meeting-ah hian District Civil Supplies Office, District Fisheries Development Office, Public Health Engineering Office-te hnen atangin an hmalakna, hmachhawp leh an harsatnate ngaihthlak a ni a. PHE aiawh hnen atang hian Vangtlang khua tui lakna tur chu peihfel thawkhat a ni tawh tih ngaihthlak a ni a, enchhinna (trial) kalpui mek niin, duhthusama khua a that veleh hman theih thuai a beiseiawm tih meeting-ah hian tarlan a ni.

Hei bakah hian Khawzawl SP Office atangin Internet chungchanga harsatna report ngaihthlak a ni a, DC Office atangin DC Office hmalakna leh chetvelna langsar zual report ngaihthlak a ni bawk.

He meeting-ah hian Khawzawl chhunga office hrang hrang hotute leh an aiawhte an tel a ni.