1928/2023-2024

Lawngtlai dated 18th September 2023: Vawiin chawhnu khan DC Conference Hall, Lawnglaiah kumin MLA Inthlanpui nei tur a inbuatsaihna chhunzawm zel niin Lawngtlai district chhung a Assembly Constituency 3-a Sector Magistrate-te tan EVM leh VVPAT hman dan training buatsaih a ni a. Pu H.Lalhmingthanga, Deputy Commissioner chuan he hun hi hmanpuiin Pu Denny Lalchhuanawma, Election Officer-in hun a kaihruai a ni.

Deputy Commissioner Pu H.Lalhmingthanga chuan kan aiawh a ram rorel tur thlan chhuahna, MLA General Election chu kan ram leh a chhung a cheng mipuite tan a buatsaih a nih angin ram leh hnam tan a thawk kan ni tih hriat a pawimawh thu a sawi a, mawhphurhna hrang hrang awmte hunbi tuk chhung ngei a hlenchhuah a pawimawh thu a sawi. Inthlanna felfai leh langtlang kalpui tur a Sector Officer-te mawhphurna pawimawh zia tarlangin an mahni bial theuh ah Election Commission of India aiawhtu an nih thu a sawi a. Mahni mawhphurhna leh tih tur hriat hmaih palh avang a inthlan chhung a harsatna thleng lo turin inthlan kaihhnawi a Training-te leh inkaihhruaina bu-te zir chiang a, ngai pawimawh turin kalkhawmte a chah bawk a ni.

Pu Denny Lalchhuanawma, Election Officer chuan Lawngtlai district-a hman tur EVM ruahman zat atanga za a sawm chu Training nan a hman tur a nih thu te, Sangau, Chawngte, Bungtlang South leh Deputy Commissioner Office-ah te a duh apiang tan a tihchhin theihin EVM Demonstration Centre siam a nih thu a sawi a. Sector Officer-te chu ECI thuchhuak angin an mahni bial theuh a EVM & VVPAT Mobile Demonstration nei turin September ni 21 atang a kalchhuak tan turin leh October kar hmasa ber chhung a zo fel hman tur a beisei an nih thu a sawi.

Lawngtlai district chhung a voter 35372 awmna 36-Tuichawng Assembly Constituency vil tur hian Sector Officer 11 ruat an ni a, Polling Station 70 a awm. Voter 28825 awmna 37-Lawngtlai West Assembly Constituency vil tur hian Sector Officer 10 ruat niin Polling Station 69 a awm a, Voter 25552 awmna 38-Lawngtlai East Assembly Constituency vil tur hian Sector Officer 5 ruat niin Polling Station 42 a awm bawk a ni. Lawngtlai district Electoral Roll ennawn mek ah hian Voter 89749 awmin chung zing a 44846 chu mipa niin 44903 chu hmeichhia an ni.