1929/2023-2024

2023 Mimkut thla ni 18: Vawiin khan Kolasib District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, Kolasib District Bawrhsap Pu John LT Sanga hovin Kolasib DC Conference Hall-ah an ṭhu khawm.

Chairman Pu John LT Sanga chuan member kal khawmte lawmna thu sawiin, bank ai awh kal khawmte chu Kolasib District hmasawn nan bank-te'n mawhphurhna lian tak an neih chu hria a, theih tawp chhuah zel turin a chah a. He huna telpuitu, Mizoram Rural Bank Chairman Pi Sheryl L. Vanchhong pawhin Kolasib District chhunga bank-te hma lakna chu ṭha thawkhata a hriat thu sawiin, bank hma lakna kal tlangin hmasawnna pawh a awm zel a beisei thu a sawi.

He ṭhut khawmah hian Lead Bank Office-a Lead District Manager (Kolasib & Mamit) Pi Lalengmawii leh NABARD hnuaia District Development Manager (Kolasib & Mamit) Pu JD Traite te bakah, Reserve Bank of India (RBI) ai awh te, bank hrang hrang leh line department ai awhte an tel a ni.

He hunah hian meeting hmasa, June ni 12, 2023-a DCC meeting minute chu pawm a ni a. Kum 2023 April thla aṭanga June thla (1st Quarter, 2023-24) chhunga Kolasib District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.

He hunah hian financial inclusion plan hnuaiah Kolasib District chhunga mihring 2,000 aia tlem chenna khaw 29 te chu bank hrang hrangte'n chan insemin, bank kal tlanga hamṭhatna hrang hrang an chhawr ve theih nan hma lakna kalpui a nih thu tar lan a ni a. Pawisa dah hmasa lo (zero balance)-a account hawn theihna, Pradhan Mantri Jan Dhan Yojana (PMJDY) leh social security scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), leh Atal Pension Yojana (APY), etc. lama bank hma lak dan te thlir ho niin, mipui tam zawkin he'ng hamṭhatnate hi an chhawr theih nan ṭan lak lehzual ni se, tih a ni a. April - June 2023 inkar chhungin bank hrang hrang kal tlangin mipui hnena sum hman leh enkawl dan inzirtirna (financial literacy campaign) ṭum 19 buatsaih a nih tar lan niin, line department-te nena ṭang ho leh NABARD aṭanga fund dil theih te pawh dilin, bank-te' n FLC tam zawk buatsaih turin hma la se, tih a ni a. Bank-a mipuiin sum an dah luh (deposit) zat za zela bank-in mipuia sum an puktir (credit) zat chhutna, Credit/Deposit Ratio-ah Kolasib District-a bank-te chuan June 2023-ah national benchmark 60% khumin CD Ratio 63.49% an nei tih tar lan niin, hetih rual hian CD Ratio ṭha lehzual a awm theih nan bank-te chuan ṭan la se, tih a ni bawk.

Kum 2023-2024 sawrkar kum chhunga Kolasib District chhunga bank-te'n loan an pek chhuah dan tur, Annual Credit Plan (ACP) ruahmanah June 2023 thlenga bank-in an pek chhuah tawh zat chu 16.91% a ni a. Bank-te chuan ACP hnuaia an target tlin ngei turin ṭan la se tih niin, mipui harsa zawkte leh kut hna thawktute chhawr theih tur loan ṭhenkhat, a bik takin, Kisan Credit Card (KCC); Agriculture loan; Micro, Medium & Small Enterprises loan leh MUDRA loan ang chi te, sawrkar sponsor scheme Prime Minister's Employment Generation Programme (PMEGP), National Rural Livelihoods Mission (NRLM) leh National Urban Livelihoods Mission (NULM) ang chi-ah te ṭan lak lehzual ni se, tih a ni bawk.

He hunah hian bank leh mipui sum vawn himna (security) lam te pawh sawi ho a ni a. RBI-in ₹ 2,000/- (cheng sang hnih) note tlang a hnuh kir chungchang pawh tar lan niin, ₹ 2,000/- tlang la kawlte tan kumin 2023 September ni 30 thlengin bank-ah dah luh leh thleng theih a ni a, hemi hun tiam piah lamah hi chuan ₹ 2,000/- tlang hi tihthih a nih tawh dawn avangin hun tiam chhunga tihfel tum vek turin DCC meeting chuan Kolasib District mipuite a ngen a ni.