1926/2023-2024

Vawiin khan School Education Minister Pu Lalchhandama Ralte chuan Darlawn Joint VC ten an buatsaih Darlawn Community Health Centre lawmna Joint VC Hall-a neih chu a hmanpui.

He hunah hian Lalchhandama Ralte chuan thusawiin hripui avangin kum hnih leh a chanve vel hnathawh theih lohin kan awm a, chuti chung chuan Darlawn khawpui dung leh vangah hmasawnna hnathawh hrang hrang hmuh tur a awm a, chung zingah chuan Darlawn PHC, CHC a hlankai pawh hi a tel tih a sawi. Minister chuan sorkarin CHC a hlankai hi a tihpuitlinna tur kawng a zawh dawn a, thawklehkhata damdawiin mamawh neih nghal thut a theih lova, a tahtawlin a lo kal zel dawn a ni a ti.

Pu Lalchhandama Ralte chuan hmar thimpui tihen nan thiltum pathum a nei tih a sawi a, chungte chu tlangdung zirna tihhmasawn te, hriselna lama inenkawlna tihhmasawn te, hmar tlangdung Zoram kawtchhuah thara siam te an ni a ti. Minister chuan Zirna thuam that hna thawh a nih dan te, hriselna lama hna thawh dan te leh hmasawnna nasa tak a awm tawh dan a sawi a. Kawngpui lamah Seling ațanga Tipaimuk road sial nan central-in vbch 1500 a dah tawh a, highway-in he tlangdung hi a paltlang dawn a, chubakah Bhaga road tur puan a ni tawh a, a hmawr a eng zel a, awmze neiin he tlangdung hi a kal a ni a ti.

Minister chuan Darlawn khaw chhunga hmasawnna hnathawh dangte pawh a tarlang a, multipurpose hall sak mek te, Godown sak te, tui leh eng lama hnathawh te, playground a phul lem phah tum mek a nih dan te a sawi a. Darlawn khawpui a țhan zel theih nan awmze neia hmalak a tul thu a sawi bawk.

He hunah hian Darlawn Joint VC hruaitute, Chalfilh Group YMA hruaitute, Joint YMA hruaitute, Joint MHIP hruaitute, MUP hruaitute, party hrang hrang hruaitute an tel a, heng pawl hrang hrang hruaitute hian Darlawna damdawiin awm țhat loh avanga nun chan tam tak an awm tawh dan te, tuna CHC a hlankai a han ni ta chu an lawmthu an sawi a, Darlawn khaw chhunga sorkar hnathawh leh hmalakna chi hrang hrangah an lawmthu an sawi bawk a ni.

Vawiin khan Pu Lalchhandama Ralte hian a bial chhung khaw țhenkhat a fang kual bawk a, East Phaileng leh Kepran te a tlawh a,  Hmarphei Presbytery Inkhawmpui thlenna tur Sawleng Hmunțha kohhran a tlawh bawk.