2022/2023-2024

Aizawl, 26.09.2023: Aizawl khawpuia cheng ten tui thianghlim hnianghnar zawka an hmuh belh theih nan theih nan SIPMIU, UD&PA hmalakna ‘Augmentation of Aizawl Water Supply and Construction of 37 MLD Water Treatment Plant’ chu vawiin chawhnu khan Deputy Chief Minister Pu Tawnluia chuan khuallian niin a hawng (commission) a; PHED Complex, Laipuitlang ah a hawnna hun hi buatsaih a ni.

Khuallian chuan thu sawiin, Aizawl khawpui chawmtu tui lakna belhchhah tura ngawrh taka hmalakna vawiinah hawn a ni ta chu lawmawm a ti a. Kum tam tak Aizawl khawpui tui a chawmtu Greater Aizawl Water Supply Phase I leh II in malkhalh tak leh indaih lo taka Aizawl khawpui a chawm ṭhin chu he Plant thar hian nasa takin a puih tur thu a sawi a. He scheme hi sorkar hmasa atanga bultan a nih dan leh sawrkarna inthlakah pawh chhunzawm zel vawiinah a hlawhtlinna hmuh a ni ta chu lawmawm a tih thu a sawi.

Deputy Chief Minister chuan SIPMIU chu nodal department ah UD&PA awm mahse vawiina hawn tak tui supply na project chu a tak taka enkawltute chu PHED engineer te an nih thu a sawi a. SIPMIU chu project a nih angin thawh hun tur tiam chin nei a nih dan sawiin Pu Tawnluia chuan covid hrileng in a sukuk avanga thawh zawh hmaa sum hmuh a tawp tak thu leh, scheme chu a pumpuia zawh a nih theih nan Chief Minister hnenah sum mamawhna an thlen thu leh sum mamawh a lo pek thu a sawi a. He project atan hian mi kawmkar leh kawng pui a lei laih te, hmun khawkrawk tak tak te paltlanga hmalak a ngaih dan te sawiin, chung zawng zawnga chuan mipui leh khawtlang hruaitute leh department te karah inhriatthiam tawnna leh thawhhona tha tak a awm chu lawmawm a ti a. Pu Tawnluia chuan he project hlawhtlinna tura hma latu zawng zawng chungah lawmthu sawiin, hmabak tlem la awm te pawh zawh thuai a nih theih nan project hna thawktute theihtawp chhuah chhunzawm zel turin a fuih a. He hmalakna hi tu ta bil ni lovin mipuiin kan intawm thil a nih avangin a enkawl zui naah pawh dimdawi takin, kan mawhphurhna te hre tlang ila tha a tih thu a sawi.

Dy. CM Pu Tawnluia chuan khawpui thang zelah tui mamawhna a sang tial tial a. Mamawhna phuhruk tura hmalak a nih rual hian tui hnar a tlem zawnga kal lo a, kan tui hna te humhalh a, chhuan lo awm leh zel tur ngaihtuah chunga hmalak tel a pawimawhzia a tarlang a. Chumi avang chuan State Legislative Assembly Session ah River Protection Bill put luh a pass a nih tak thu te a sawi a ni.

Vawiin programme-ah hian Bamboo Link Road Board Vice Chairman Pu Ramthanmawia, MLA Pu Zothantluanga, MLA Pu Zondintluanga, AMC Dy. Mayor R. Thanglura leh sawm bik mi thahnem tak an tel a. UD&PA Jt. Secretary Pi Zarzokimi chuan kalkhawmte lawmna thu sawiin, Er. Lalrothanga, Program Director, SIPMIU hnen atangin technical report ngaihthlak a ni a. PHED Engineer in Chief Er. F. Liantluanga chuan thu sawi bawkin, PHED Secretary Er. C. Lalremsiama chuan lawmthu sawiin hun a khar a ni.

37 MLD Water Treatment Plant project lian tak hi hlawhtling takin diesel engine hmangin September ni 22 atanga 24 chhung khan Trial Run neih a ni a. State Investment Program Management and Implementing Unit (SIPMIU), UD&PA Department chuan kum 2016 atang khan he project siamin bul an lo tan chho tawh a. Greater Aizawl Water Supply, Phase I leh II khuahna thlang lam Tlawng lui dung kilometre riat (8) Mualkhang Tanhril ramah 37 MLD Water Treatment Plant thar hi sak a ni. Heta tang hian Laipuitlang zemlianah tui tih thianghlim sa hi Rising Main (pipe lian tak, feet hnih leh a chanve hawltlang a lian), kilometer sawmpakhat (11) zeta thui hmanga pump chhoh a ni.

He Project hi nitin tui litre maktaduai sawmthum leh pasarih pump lut thei tura ruahman a ni a. India rama khawpui lian a cheng ten an dawn thin ang nitin mi pakhat tan litre 135 ang a sem theih tura ruahmanna siam a ni a, chu chuan kum 2033 thleng mipui nuai li, singli leh sangnga (4,45,000) a chawm zo dawn a ni. SIPMIU in khawpui chhung tuam chhuaka pipeline thar leh lian a phum tawh te, Zonal Tanky thar an sak te chuan he tui mamawh belh hmang hian tangkai zawkin mipuiah tui sem a ti awlsam tawh dawn a ni.

He Trial Run-ah hian Diesel Engine lian 1475 HP hmangin tui thianghlim Laipuitlang zemlianah pump thlen a ni a. Tun dinhmunah Sub Station leh a electric hmanga pump-na tur bun fel a ni tawh bawk a, Sihhmui atanga 33/11 kV power supply line pawh ngawrh taka hnathawh leh enchhin mek a ni.