2023/2023-2024

Hnahthial the 26th September 2023: Kumina Mizoram Legislative Assembly inthlanpui lo awm tur atana inpuahchahna kal zelah Hnahthial District-a mawhphurhna chelhtu ‘Nodal Officers’ te chu vawiin khan DC Conference Hall-ah District Bawrhsap leh District Election Officer, Pu Chuauhnuna kaihhruaiin an thukhawm.

Bawrhsap Pu Chuauhnuna chuan inthlan hlawhtling taka kalpui anih theih nan Nodal Officer-te inkarah thawhhona tha a pawimawh hle thu sawiin, a tul apiang inhrilh hre vat a, thawhhona tha tak nena ke pen tlang turin a chah a. An mawhphurnate felfai taka an hlenchhuah theuh theihna turin ECI in inkaihhruaina a siam te bel taka lo inzir turin a chah a ni.

Vawiin thutkhawmah hian Nodal Officer-te chuan anmahni mawhphurna zawn theuha hma an lak tawh te leh hmachhawp an neihte PowerPoint presentation an pe a, election tluang leh felfai taka neih anih theihna tura hmalak tlan dan tur te an sawiho a ni. Vawiin Nodal Officer thutkhawmah hian District Bawrhsap Pu Chuauhnuna bakah District Superintendent of Police Pu Vineet Kumar IPS, Addl DC Pu Lalvenhima, SDO (S) Pu Neng Thianlala, EO leh BDO Pu Lalbiakfela, SDC Pi Betty Lalrinfeli bakah Pi K Ngosai DIPRO te an tel a ni.