2132/2023-2024

Khawzawl, 3rd October 2023: Vawiin khan Deputy Chief Minister, 22-Tuichang AC bialtu ni bawk chuan Tualte Tomato Processing Unit chu khuallian niin a hawng a. Khawzawl DC Pu K. Lalrohlua chuan khualzahawm niin he hun hi a hman pui bawk.

Vanhnuailiana Hall, Tualtea hawnna inkhawm neihah khuallian Pu Tawnluia chuan Tualte khuain eizawnna atan Tomato an hmang thei chu a lawmpui thu a sawi a, bazara zawrhchhuah mai piahlamah tomato sawngbawl theih a ni tur leh vawnthat a ni tawh tur chu thil lawmawm tak a ni, a ti. Tualte khuain ruahtui tlak mumal loh kumah pawh cheng nuai 200 man chuang tomato an thar chhuak tawh chu thil lawmawm tak a ni, a ti bawk. Kuthnathawktute chu an hlawhtlin chhoh zel a beisei thu sawiin, theihtawp chhuah a hma lo la zel turin a chah.

Deputy Chief Minister hian tunhnaia sawrkar sikula hlan kai tak Tualte High School chu a lawmpui thu a sawi a. Sialhawkah Pineapple Processing Plant din tura hmalak mek a nih thu te, Chawngtlai leh Khawhaiah sapthei ching tura ruahmanna kalpui mek a nih thu leh cheng nuai 30 man chuang sapthei zamna thirzai sem chhuah a ni tawh tih a tarlang. A department chan PHE hnuaia hmalakna pawh tarlangin Pu Tawnluia chuan Tuichang AC huamchhungah commission hmabak Khawhai chhiar telin khawtinah tui pek vek a ni tawh a ti a. Mizoram sawrkarin SEDP hmangin mitin huapzo hmasawnna tluantling a kal pui mek zel thu pawh a sawi bawk a ni.

Khualzahawm Pu K. Lalrohlua chuan Tualte High School sawrkar sikula hlankai a ni ta chu a lawmpui thu sawiin, zirlaite leh zirtirtute chu result tha zawk neih zel tum turin a fuih a. An khaw chhunga hmasawnna ruhrel lo lut te chu dimdawi taka enkawl tur leh tangkai taka hmang turin thu a chah nghal bawk.

Khawzawl District Horticulture Officer Pu Lalnunpuia’n Technical Report-a a tarlan danin, Tomato Processing Unit hi SEDP sum cheng nuai 50 hmangin April ni 21, 2023 khan a hmun laih hna thawh tan a ni a. Tomato sawngbawlna khawl ‘Tomato Ketchup Line’ hi cheng nuai 40 man niin, FOCUS (IFAD) hnuai atanga lei a ni a, a bunna tur building hi square meter 108 a zau a ni a. A sirah hian ‘Boiler House’ square meter 10.5 a zau a awm bawk a, khawl hian darkar khatah Tomato kg 100 sawngbawl thei tura ngaih a ni. Processing Unit tinung tur hian SEDP sum cheng nuai 7.9 hmangin 11kv line meter 500 a sei pawtin, 63 kVA a chak Transformer bun a ni a; he lai hmunah vek hian tomato vawnthatna tur ni zung chakna hmang Cold Storage Metric Tonne 10 dawl zo te, RKVY hnuai atanga siam greenhouse cluster square meter 500 a zau te leh litre 50,000 dawng tui dahkhawlna te bun tel a ni bawk.

Inkhawma tarlan danin Tualte khua hian kum 2019 atang khan Tomato an ching tan a, tun dinhmunah tomato variety chi hnih - Arka Samrat leh Arka Abhed te chingin chhungkua 200 chuangin eizawnna’n tomato hi an hmang mek a ni. Kum 2023 September thla thleng hian cheng nuai 200 man tomato an hralh chhuak tawh a; kum 2019-2023 chhung hian Tomato atangin cheng nuai 1193 chuang Tualte khua hian an lalut tawh a ni.

Tomato Processing Unit hawnna hun hi Horticulture Department Director Pu C.H.  Lalmuanpuia chuan a kaihruai a. Tualte Tomato Grower’s Co-op. Society Chairman Pu R. Lalchhanchhuaha pawhin thu sawina hun a hmang a, Tualte VCP Pu J.H. Lalzemawia’n lawmthu sawina hun  a hman zawhah inkhawm hi tihtawp a ni.