2131/2023-2024

Mamit 3rd October, 2023 : Vawiin khan Pu Lalruatkima, Rural Development Minister chuan Kawrtethawveng BDO Pisa leh BDO Quarters Building chu hawngin Khuallian a ni. He hunah hian ICT Minister Pu Robert Romawia Royte chuan NABARD kaltlanga sak tur Village Knowledge Center, Kawrtethawveng chu khualzahawm niin lungphum a phum nghal bawk.

Khuallian Pu Lalruatkima chuan hripui na tak karah RD department thawktute leh khawtlang hruaitute thawhhona zarah BDO office building thar hawn a ni chu lawmawm a tih thu a sawi a. BDO Pisa hawn hi thil hautak tak niin, hun hmalamah pawh Pisa hawn a nih theih nan sawrkarahte nawrna a lo awm tawh a ni a ti. Khuallian chuan RD Block thar a lo pian nan March ni 25, 2022-ah RD Department chuan Cabinet memo siamin, hma a la tan a. Kawrtethawveng RD Block ah hian khawtlang hmasawnna piah lamah kan zoram dinhmun ngaihtuahin Kawrtethawveng-ah hian pal rinawm tak kan dah a nih loh chuan he hnam lokal zel tur hian enge a tawn ang tih ngaihtuahna thui tak a awm a ni a ti a. He hnam nihna thinlung, ram lokal zel tur hnam pasaltha te'n an thlah lokal zel tana ram an lo zuah hi hnamdangin an luah ang tih hlauhthawnna tlang atangin RD Block pahnih Kawrtethawveng leh Tlabung hi a lo piang chhuak ta a nih thu a sawi.

Minister Pu Lalruatkima chuan Mizoram Population a pung chak lo a, chu chuan nakinah harsatna hnam ang pawhin a thlen thei a ni a ti a. Ram himna ngaihtuah rengin hnam tan fahrin man hla ni tura tan kan lak zel a ngai a ni a ti. Khawthlang tlangdungah ram leilung hausakna atangin eizawnna a tam a, chutiang karah chuan hmundang tlangdung dang ang bawkin hmasawnna kan mamawh a ni a ti a. Chutiang hmasawnna a lo thlen theih nana Kawrtethawveng chhimlam Nghawngkawl tlanga ram neitu Pu Zahmingthanga te'n a thlawna sawrkar an pek avangin lawmthu nasa takin a sawi a ni. Kawrtethawveng Block hian Post thar panga a keng tel a, chungchu nikum 2022 khan tih fel vek a nih tawh a nih thu a sawi bawk.

Minister Pu Lalruatkima chuan Mizoram RD Department chuan Mizoram mipui 80% vel an kan enkawl mek a, kan sorkar term chhung hian ni 100 thawh tura tih a nih angin kan la thawk thei zel a ni a ti. Mizoram ah Ni 100 inhlawhna tha taka kalpui a nih avangin Puducherry RD Minister chu Mizoramah a lo kal hial a ni a ti a. Kan thalaite dinchhuahna turin self help group kaltlangin MzSRLM hmalakna-in kalpui mek a ni tiin thalai mi tumruh, taima leh teirei peih te'n hlawhtlinna an chang mek zel chu a lawmawm hle a. Mizote chu kutthemthiam tak kan ni tih hi hre reng ila, chu kan themthiamna chuan eizawnna remchang min siamsak zel a ni a ti bawk. Mipuite inpekna leh thawhhona zarah a Department-in hlawhtlinna an chang thei chu lawmawm a tih thu a sawi bawk. Pathianin zofate min hmangaih a, kan tanrualna rah kan seng mek zel a ni tiin vawiina hawn tak building thar chu khawtlangin tha taka an vil avangin tha taka zawhfel theih a ni a, vil chhunzawm turin a chah bawk. BDO leh a staff-te chu VC-te thurawn lakna leh ngampataka an len theihna turin in hawng taka awm tura chahin duhsakna a hlan nghal a.

Khualzahawm Pu Robert Romawia Royte chuan hunrei tak ata tawh mi hmasate pawhin an lo vei leh nghahhlelh em em Kawrtethawveng BDO hawn a nih mai bakah Office tha tak hawn a ni ta chu thilchhinchhiahtlak leh lawmawm tak a ni a ti. A building sak dan phung a tha hle a, uluk taka enkawl leh vil a nih tih a lang chiang hle a, Mizoram sawrkar, a changtu minister leh thawktute chungah lawmthu a sawi. I&CT Department hnuaiah Mizoram chhunga Center 15 zinga Center pakhat niturin Village Knowledge Center, Kawrtethawveng RD Block Office behchhana dah tel an ni ta chu khaw mipuite'n tangkai taka an hman a duhsak thu a sawi a, tihchangtlun chhunzawm zel a nih dawn thu a sawi bawk. Kawrtethawveng Tennis Court chu Sport Department kaltlangin thuamthata chei thar tum a ni a, Khawtlang remtihna-a Sport Items danga hman theih tura her rem dan pawh ngaihtuah a nih dawn thu a sawi bawk.

Pu V. Lalengmawia, Joint Secretary chuan he hun hi a kaihruaiin kalkhawmte lawmna thu a sawi a. Pu Lalhmingliana, BDO Kawrtethawveng leh Pu Vanlalringa, Senior Infomatics Officer te hnen atangin Technical Report ngaihthlak a ni a. Pu Vanlalchhuanawma Chawngthu, PD DRDO Mamit District chuan lawmthu sawiin he hun hi a khar a ni.

January ni 20, 2023 khan Kawrtethawveng RD Block hi hawn a ni a. Kawrtethawveng Block Development Office hi MGNREGS leh MzSLRM hnuaiah Rs.195. 75 lakh sengin Ni 28 November, 2022 khan sak tan a ni a. Ni 30th September, 2023 khan sak zawh a ni. Mizopa chhiara chawng li niin, chhawng chung berah Conference Hall cum training centre awmin, a building hi lirnghing laka him tura sak a ni. BDO quarters hi Rs. 98.24 lakh sengin Ni 28th November, 2022 khan sak tan a ni a, Ni 30th September, 2023 khan sak zawh a ni a. Mizopa chhiara chhawng hnih niin a building hi tunlai thiamna hmanga tha thei ber tura duan a ni bawk. Block Development Office leh Quarter sak hna hi Rural Development, Kawrtethawveng RD Block te'n an thawk a ni.